سااكاشۆيلي: تۋريزمدى دامىتپاساق كەرۋەننەن قالارىمىزدى تۇسىندىم

1088
0
بولىسۋ:

باتۋميدى گرۋزييانىڭ موناكوسىنا اينالدىرعىم كەلدى. ەلگە تۋريست تارتۋمەن تىكەلەي وزىم اينالىستىم.
اربىر ينۆەستورمەن جەكە جولىعىپ, يلىپ توسەك, جايىلىپ جاستىق بولدىم.
قىدىرتتىم, كونتسەرتكە اپاردىم, بيلەتتىم, ماسايتتىم, قىمباتتى مەيرامحانالاردان دام تاتقىزدىم, مونشاعا اپارىپ ارقاسىن ىسقىلادىم, گرۋزين شارابىنىڭ ەڭ باعالى دەگەنىن الدارىنا توستىم, تىكۇشاقپەن تۇتاس گرۋزييانى ارالاتتىم, اي ايتەۋىر قارجىسىن بىزگە قۇيدىرۋ ۇشىن نە ىستەمەدىم دەسەڭشى.
جەڭىل جۇرىستى قىزدارعا عانا جولاتقام جوق, وزگەسىن تۇگەل اتقاردىم.
ينۆەستورلاردىڭ كوپشىلىگىمەن وتباسى بولىپ ارالاسىپ-قۇرالاسىپ كەتتىك كەيىننەن. ويتپەسىمە شارام جوق ەدى, شىكىرەيىپ, شىرەنىپ وتىرسام ينۆەستور ات-تونىن الا قاشار ەدى.

موناكو كنيازى البەردى ارنايى شاقىرتىپ, ۇش كۇن بويى ەل ارالاتتىم. كنيازعا كەلگەندە قىزىق وقيعا بولدى.
سۆانەتييادان باتۋميعا ورالار تۇستا ەۋروپاداعى ەڭ بيىك تاۋ ۋشگۋليدىڭ القىمىندا ورنالاسقان اۋىلدىڭ ۇستىنەن ۇشىپ بارا جاتتىق.
بۇل اۋىل باعزى اۋىل. VII عاسىردان بەرى بار. تۇرعىنداردىڭ ومىر داعدىلارى دا سول داۋىردى ەسكە سالادى. جارىق جوق. وركەنيەتتىڭ يگىلىگىنەن ادا, جالپاق الەمنىڭ ىردۋ-دىردۋىنان جىراقتا جاتقان اۋىل-تۇعىن.
البەر كنياز الگى اۋىلعا توقتاپ, از ايالدايىقشى, كورگىم كەپ قىزىعىم تۇرمىن, تىكۇشاق وسى اراعا قونسىنشى دەپ قولقالادى. قادىرمەندى مەيماننىڭ كوڭىلىن قالدىرعانىمىز ورىنسىز بولار ەدى. قوندىق. تىكۇشاق ىشىندە تورتەۋمىز – مەن, ۇشقىش جىگىت, كنياز البەر جانە ونىڭ كومەكشىسى بار. تۇستىك. تۇسە سالا اۋىل تۇرعىندارى قورشاپ الدى. مەنى بىردەن شىرامىتتى, كنياز البەردى تانىعان جوق, نازار دا اۋدارعان جوق.
الاقانداي اۋىلعا پرەزيدەنتتىڭ اياق باسقانى ايتۋلى وقيعا. امان-ساۋلىق سۇراسقاننان كەيىن تۇرعىندار بىزدى اۋىل شەتىندە ورنالاسقان – مۋزەيگە الىپ جۇردى. بۇل مۋزەيدىڭ ەرەكشەلىگى سوندا سوناۋ ريم يمپەريياسىنىڭ جادىگەرلەرى ساقتالعان.
تۇرعىنداردى تۇگەل ىلەستىرگەن جوقپىز, ەكى-ۇشەۋى عانا جول باستادى. اۋىلدىڭ جالعىز اياق جولىمەن مۋزەيدى بەتكە الىپ تارتىپ بەردىك.
جول بويى جولىققان اۋىل ادامدارىنىڭ اۋلاسىندا از ايالداپ, جەرگىلىكتى جۇرت راكى دەپ اتايتىن اراقتان دام تاتتىق. مۋزەيگە جەتكەنشە كنياز البەر اجەپتاۋىر قىزىپ الدى. تۇرعىندارمەن قالاي تىل تاپقانى بەلگىسىز, الدەنەنى ايتىپ كوڭىلدى كەلەدى. جول باستاعان جىگىتتەردىڭ الدىن وراپ, كەرۋەننىڭ كوش باسىنا شىعىپ الدى.
مۋزەيگە جەتە بەرە الدىمىزدان تايىنشاداي توبەت ارسىلداپ شىقپاسى بار ما! قاپەلىمدە قايتەرىمىزدى بىلمەي ابدىراپ قالدىق. ۇشقىش جىگىت شاميلدىڭ ۇلتى داعىستاندىق-تۇعىن. جاۋىرىنىم جەر يىسكەمەگەن بالۋانمىن دەپ بوسكەندە سونداي ەدى, الگى الماپساداي توبەتتى كورگەندە شاميل ەكەش, شاميل دا جىلىستاي بەردى.
توبەت كنياز البەرگە تۋرا تارتتى. ازۋ تىسى اقسيىپ, اۋزىنان اق كوبىگى اقتارىلىپ, شايناپ جىبەرۋگە شاق تۇر.
جەرگىلىكتى تۇرعىندار دا الگى يتتىڭ شايپاۋ جۇزىن كورىپ تايت دەۋگە باتپادى بىلەم.
بىتكەن جەرىم وسى دەپ ويلادىم. وقيعانىڭ ارى قاراي قالاي وربيتىنى كوز الدىمدا كولبەڭدەپ وتتى.
كنياز البەر گرۋزيياعا كەلەردەن ەكى اپتا بۇرىن نەكەلەسكەن. تويىن تىكەلەي ەفيردەن كورسەتىپ, كۇللى الەم تاماشالاعان ەدى. ال ەندى نە بولدى؟
ەرتەسىنە-اق ەۋروپاداعى گازەت-جۋرنالدىڭ بىرى قالماي: «گرۋزييادا قىدىرىپ جۇرگەن كنياز البەردى يت تالاپ ولتىردى. ۇيلەنگەنىنە اي دا تولماعان بەيشارا كنيازدىڭ جارى جەسىر قالدى».
«سااكاشۆيلي سورلاتتى. يت تالاپ تاستاعان كنياز البەر شۇعىل تۇردە گرۋزييادان موناكوعا جەتكىزىلدى» دەپ جامىراسا جازادى.
گرۋزييانى تۋريستىك ورتالىققا اينالدىرام دەگەن ارمان-مۇراتىم ادىرا قالادى» دەپ ويلادىم.
سويتكەنشە بولعان جوق, وزىنە قاراي تۇرا ۇمتىلعان توبەتتى كنياز البەر قۇلاشىن سەرمەپ, تۇمسىقتان تاڭق ەتكىزىپ ۇرماسى بار ما!
مۇندايدى كۇتپەسە كەرەك, الگىندە عانا البەردى جۇلىپ-جەۋگە شاق تۇرعان الگى يت قۇيرىعىن بۇتىنا قىسىپ, جىم-جىلاس جوعالدى.
تايىنشاداي يتتى تالدىرا جازداعان كنياز موناكوعا ورالعاسىن الگى وقيعانى كەلىنشەگىنە ادەمىلەپ تۇرىپ اڭگىمەلەپ بەرىپتى.
گرۋزييانى قۇمارى قانعانشا ارالاعان البەر اقىرىندا باتۋميگە قوماقتى ينۆەستيتسييا قۇيۋعا كەلىستى.

پۋتين رەسەيگە گرۋزين شارابىن كىرگىزۋگە تىيىم سالعاندا ونىڭ جارناماسىن جاساۋدى وز موينىما الدىم.
تبيليسيدەن سال شەتكەرىرەك اۋماعى ارى كەتسە ەكى گەكتار جۇزىم باعىن ساتىپ الىپ ەلگە رەسمي ساپارمەن كەلگەن شەتەلدىڭ پرەزيدەنتتەرى, پرەمەرلەرىن الگى جۇزىمدىككە الىپ باردىم.
كەلىسسوزدەردى وسى ارادا جۇرگىزدىك. مەركەل, بۋش, وباما, يۋششەنكو, ساركوزي سەكىلدى ايدىك ادامدار جۇزىمدى تاباندارىمەن تاپتاپ, شاراپ جاسادى.
مۇنى شاراداعى جۋرناليستەر تاسپاعا تۇسىرىپ, جارىسا جارييالاپ جاتتى. جاھاندىق دەرجاۆا باسشىلارىنىڭ جالاڭ اياق جۇزىم كەشىپ, شاراپ ازىرلەگەنى كىمگە دە بولسا قىزىق قوي.
گرۋزين شارابىنىڭ جارناماسىن وسىلاي جۇرگىزدىك.
گرۋزييانىڭ اۋماعى الاقانداي عانا. تۋريزمدى دامىتپاساق كەرۋەننەن قالارىمىزدى تۇسىندىم. تبيليسيدى مالدانىپ وتىرا بەرگەننەن وپا تاپپاس ەدىك.

باتۋميدى دامىتۋدا تۇرىكتەردىڭ كوپ كومەگى تيدى. بۇل ولكە تۇركييامەن شەكارالاس جاتىر. دال وسى اۋماقتا 10 ملن-عا تارتا ادام تۇرادى.
الدىمەن تۇركييا مەن گرۋزييا اراسىندا ەركىن بارىس-كەلىس ورناتتىق, تۇرىك تۋريستەرى گرۋزيياعا جەكە باسىن راستايتىن كەز-كەلگەن كۋالىكتى كورسەتىپ ۆيزاسىز كىرەتىن بولدى.
گرۋزييانىڭ تاپ ىرگەسىندەگى تۇركييانىڭ شەكارا ماڭى تۇرعىندارى جۇزدەپ, مىڭداپ باتۋميگە اعىلا باستادى بۇدان سوڭ.
سويتسەم تۇرىكتەر ۇشىن باتۋمي بوتەن ەمەس ەكەن. بۇل ولكەنى وز ارالارىندا «مەملەكەتىم», بىلايشا ايتقاندا تۋعان توپىراقتىڭ بىر پۇشپاعى دەپ اتايدى ەكەن ولار.
بۇل دا تەكتەن-تەگىن ەمەس. XVIII عاسىردىڭ باسى حىح عاسىردىڭ سوڭىنا دەيىن باتۋمي وسمان يمپەريياسىنىڭ قۇرامىندا بولدى.
ەردوعانمەن العاش تانىسقاندا:
«باتۋميدىڭ وتكەن تاريحىن مايىن تامىزىپ اڭگىمەلەيتىن اجەمدى اۋزىمنىڭ سۋى قۇرىپ تىڭدايتىن ەدىم. بىر بۇيىمتايىم بار. تانىستىعىمىزدىڭ قۇرمەتىنە باتۋميگە الىپ بارساڭىز» دەپ وتىنگەنى ەسىمدە.
سول جولى باتۋميدى ارالاعان ەردوعاننىڭ ەڭسەسى تۇسىپ, تۇركيياعا تۇنجىراپ ورالعانى دا جادىمدا.
«مۇندا داۋىل جۇرگەن بە, الدە ودان وزگە تابيعي اپاتقا تاپ بولدىڭىزدار ما؟ اجەم ايتاتىن باتۋمي مۇلدە باسقا بولاتىن», -دەپ ەدى ول.
بۇل سول كەزدەگى گرۋزييانىڭ توزىڭقىراپ تۇرعان تۋريزمىنە بەرىلگەن شىنايى باعا ەدى.
گرۋزييا مەن تۇركييانىڭ اراسىندا ەركىن بارىس كەلىس ورناعاسىن تۇرىكتەر تايلى-تۇياعى قالماي باتۋميگە اقشا قۇيۋعا كوشتى. باتۋميگە بەت العان تۇرىكتەردىڭ كوبى ساۋىق ىزدەپ كەلەتىن. ولار مۇندا كازينو وينايتىن, قىدىراتىن, تۇنگى كلۋبتاردىڭ تابالدىرىعىن توزدىراتىن, ىشىپ جەيتىن.
باتۋمي تۇرىك تۋريستەرى ۇشىن ەۋروپانىڭ بىر بولشەگىنە اينالدى وسىلايشا.
باتۋمي تۇرىك ينۆەستورى ۇشىن قارجىلىق وفشورعا اينالدى. بىرىنشىدەن بىزدە سالىق تومەن, اقشا اۋدارىمدارى جەڭىل, سايكەسىنشە جەمقورلىق اتىمەن جوق.
باتۋميدەگى ەكونوميكالىق ەركىندىك تۇرىكتەردى بىردەن باۋراپ الدى.
باتۋميدەگى ەڭ العاشقى زامان سۇرانىسىنا ساي قوناقۇيدى تۇرىك بيزنەسمەنى نۇرەتين چارميكلى تۇرعىزدى.
سويتىپ تۇرىكتىڭ وزگە ينۆەستورىنا باتۋميگە قارجى قۇيۋعا جول اشتى.
چارميكلى تۇركييانى گرۋزيياداعى ەلشىسى-تۇعىن. بىز وعان باتۋميدەگى لاۆرەنتيي بەرييانىڭ ساياساجايىن سۋ تەگىنگە ساتا سالدىق. ىشى-سىرتى ساتپاق-ساتپاق ساياجايدىڭ سىقپىتى كەتىپ تۇرعان. ونى بارىبىر دە ەشكىم الماس ەدى.
ال چارميكلى دال وسى جەردەن ازىر الەمگە ايگىلى شەراتون قوناق ۇيىنىڭ قابىرعاسىن قالادى. اۋماعى ات شاپتىرىم كازينو تۇرعىزدى. بۇلاردىڭ ىرگەسىنەن قوناق ۇي مەن كازينو قىزمەتكەرلەرىنە ارناپ باسپانا سالدى.
باتۋميگە ينۆەستوردى وسىلاي تارتتىق.
اربىر ينۆەستورمەن جەكە جولىعىپ, يلىپ توسەك, جايىلىپ جاستىق بولا بىلدىم.
قىدىرتتىم, كونتسەرتكە اپاردىم, بيلەتتىم, ماسايتتىم, قىمباتتى مەيرامحانالاردان دام تاتقىزدىم, مونشاعا اپارىپ ارقاسىن ىسقىلادىم, گرۋزين شارابىنىڭ ەڭ باعالى دەگەنىن الدارىنا توستىم, تىكۇشاقپەن تۇتاس گرۋزييانى ارالاتتىم, اي ايتەرۋىر اقشاسىن بىزگە قۇيدىرۋ ۇشىن نە ىستەمەدىم دەسەڭشى. جەڭىل جۇرىستى قىزدارعا عانا جولاتقام جوق, وزگەسىن تۇگەل اتقاردىم. ينۆەستورلاردىڭ كوپشىلىگىمەن وتباسى بولىپ ارالاسىپ-قۇرالاسىپ كەتتىك كەيىننەن. ويتپەسىمە شارام جوق ەدى, شىكىرەيىپ, شىرەنىپ وتىرسام ينۆەستور ات-تونىن الا قاشار ەدى.

گرۋزيياداعى شاڭعى سپورتىن دامىتپاق ويمەن ايگىلى شاڭعىشى البەرتو تومبانى يتالييادان ادەيىلەپ الىپ كەلىپ, ۇش كۇن بويى شاڭعى تەپتىك. ۇش كۇن بويى قارعا مالتىقتىم, قۇلادىم, جاراقات الدىم. بىراق بارىبىر ماقساتىما جەتتىم. ايگىلى البەرتو تومبا سىرعاناعان شاڭعى بازاسىن كوزىمەن كورۋ ۇشىن جەر جۇزىنەن جۇزدەگەن, مىڭداعان شاڭعىشىلار كەلدى.

قازىر گرۋزييادا وقۋعا تۇسەتىن جاستاردىڭ باسىم بولىگى تۋريستىك فاكۋلتەتتەردى تاڭدايدى. تۋريستىك فاكۋلتەتتەر پايدا بولعالى بىزدە سەرۆيس دۇرىستالدى. تۋريستىك فاكۋلتەتتەردىن پايدا بولۋىنا بىزدىڭ جانكەشتى ەڭبەك تۇرتكى بولعانى ايتپاسا دا تۇسىنىكتى.

سااكاشۆيلي. «پروبۋجدەنيە سيلى» كىتابىنان

اۋدارعان: دۋمان بىقاي

فەيسبۋك پاراقشاسىنان 

بولىسۋ:

Facebook ارقىلى جازىلعان پىكىرلەر

پىكىر نەمەسە جاۋاپ جازۋ

1 + 15 =