"ҚАЗАҚ ҮНІ" - ҚАЗАҚСТАНДАҒЫ ҮЗДІК ИНТЕРНЕТ САЙТ БАЙҚАУЫНЫҢ ЖЕҢІМПАЗЫ!!!



Ана аты ардақталды

Алматы қаласындағы №178 физика-математика бағытында білім беретін арнаулы мектепте «Алтын жүректі анамыз» атты шара болып өтті. Ашық сабақ түрінде өткен бұл шараны 5 «қ» сынып жетекшісі Эльмира Рапилова мен оның шәкірттері ұйымдастырды. Оған мектеп директоры Қайратбек Шадиев бастаған ұстаздар ұжымы, оқушылар мен ата-аналар қатысты.

Ашық сабақ көмекке зәру панасыз балаларды өз қам­қорлығына алып, өскелең ұрпақтың рухани-адам­гер­шілік тұрғысынан білім алып тәрбиеленуіне үлкен септі­гін тигізетін «Бөбек» қайы­рымдылық қорының негізін қалаушы, жетім балалар үшін отбасылық үлгідегі «Үміт» балалар қалашықтарын құрып, «Өзіңді өзің таны» атты балаларға рухани-адамгершілік білім және тәрбие беру идеясының авторы Сара Алпысқызының туған күніне орайластырылды. Республикамыздағы колледж­дер мен жоғары оқу орындары және училищелерде білім алып жүрген жетім балалардың жағдайларына ерекше назар аударатын Сара Алпысқызы «Бөбек» қоры арқылы оларға тұрақты қайырымдылық көмек көрсетіп келеді.

Сыныптың бетке ұстар озат оқушысы Әмина Жарылқасын белгіленген бағдарлама бойынша шараны ұтымды жүргізіп, дос-құрбыларын шебер ұйымдастыра білді. Алдымен оқушылар «Шат­тық шеңберін» құрып, қолына шар ұстау кезегі келгенде ана туралы әрқайсысы өз ой-пікірлерін ортаға салды. Ананың балаға деген кіршіксіз махаббаты, оның аялы алақаны мен шексіз қамқорлығы, біздің өмірімізде аналардың атқарар өлшеусіз еңбегі жан-жақты сөз болды. Әрбір оқушы анаға деген жүрекжарды лебіздерін жеткізе білді.

Шара барысында тақырып аясы кеңейе түсті. Асыл анадан тәрбие алған қыз баланың ертеңгі күні қандай болу керектігі де айтылды. Қазақ қыздарының сұлу да сымбатты, тәрбиелі, инабатты, кішіпейіл, ел мен туған-туысқандары алдында сыйлы, болашақта өз шаңырағының ұйытқысы, бақыты мен берекесі бола білу керектігі де айтылды.

Бүгінгі балаларымыздың саналы дүниетанымы мен білімділігі қуантады. Небары бесінші сыныпта оқитын­дықтарына қарамастан жеткіншектер туған еліне, туған жеріне деген сүйіспеншіліктері мен Отанына деген адалдық сезімдерін анық байқатты. Бүгінгі балалар өнерлі де. Оны кейбір тақырыптарға орай сахналандыру кезінде көрсете білді.

Айта кетелік, №178 мектептің негізгі бағыты физика-математика болса да оқу ордасында әдеби, мәдени, спорттық және өзге де тақырыптағы шаралар жиі өткізіліп тұрады. Бұл баланың жан-жақты дамуына, саналы тәрбие алуына көмегін тигізері сөзсіз. Бүгінгі заман талабы сол емес пе?!…

Гүлмира БАҚЫТЖАНҚЫЗЫ,

Қазақ үні




Осыған ұқсас:

  1. Сенат төрағасы: Бірінші сыныптан бастап әуелі ҚАЗАҚ ТІЛІНЕ ден қою керек
  2. Мектеппен қоштасу кештері құдалық той секілді – журналист
  3. Қазақ мектебінде орыс сыныбын ашу – Тәуелсіздіктің тағдырына балта шабу!
  4. Былтыр елімізде 3 мыңға жуық оқушы қыз жүкті боп қалған
  5. Желіде мектеп формасын шешпестен күйеуге тиген қыз елдің ашуын келтірді (видео)
  6. Үздік кәсіпкер мектепті үздік бітіргендердің бәріне iPhone сыйлады


Пікір жазылмаған

Пікір жазу
Әлі ешкім пікір жазған жоқ! Бірінші болып пікір жазыңыз!

Пікір жазу үшін тіркеліңіз немесе кіріңіз.