Бердібек САПАРБАЕВ: ӘКІМДЕР ӨЗ ҚАЛТАСЫ МЕН МЕМЛЕКЕТ ҚАЗЫНАСЫН ШАТАСТЫРМАУЫ КЕРЕК

Ақтөбеде ауыл әкімдерінің форумы өтті. Форумға Батыс Қазақстан, Атырау, Маңғыстау облыстарындағы 350-ден астам ауыл әкімі қатысты. Бұдан былай елімізде ауыл әкімдерінің өз бюджеті болады. «Жергілікті өзін өзі басқаруды дамыту мәселелері туралы» Заңына сәйкес халық саны 2 мыңнан асатын ауылдар келер жылы бірнеше салықтан түскен қаржыны жергілікті жерге жұмсайды. Ал 2020 жылдан бас­тап барлық ауыл әкімі бюджет қар­­жы­сының игерілуіне, мақ­сатты жұмсалуына жауап береді. «Соңғы жылдары жергілікті биліктің рөлін күшейту үшін төртінші дәрежедегі бюджетті енгізу жұмысы жүргізіліп жатыр. Бұл өте дұрыс шешім. Жергілікті әкімдердің өз бюджеті болуы керек. Олар өз шығынын өздері жоспарлап, қаржыны жұмсауы тиіс. Ақтөбе облысында Үкімет тапсырмасына сәйкес жұмыс жүріп жатыр. Өңірде барлығы 147 ауылдық округ бар. Оның 50-і келер жылдан бастап өз бюджетін басқарады. Барлық деңгейдегі әкімнің қаржылық, экономикалық сауаттылығын арттыру үшін арнайы семинар өтті. Әкімдер жұмысқа дайын», – деді Ақтөбе облысының әкімі Бердібек Сапарбаев. Қазынаға түскен қаржыны басқару үшін барлық әкімге компьютер беріліп, интернетке қосылады. Бұл жұ­мыс Ақтөбеде түгел атқарылды. «Бірін­шіден, әкімдер заңды сақтауы керек. Екіншіден, өз қалтасы мен мемлекет қазынасын шатас­тырмауы тиіс. Сонда жұмыс жүреді», – деді Бердібек Сапарбаев. Ауыл әкімдерінің форумы кезінде мемлекеттік сату, сатып алуды жүргізетін мамандарға сұраныстың артуы мүмкін деген болжам айтылды. Бұл алдағы уақытта қаралатын сұрақ. Себебі, ауыл халқының саны өсіп отырған кезде қызметкерлердің жүктемесі артып, сұраныс болуы мүмкін. «Жергілікті өзін-өзі басқару кезінде салықтан түскен қаржыны ауыл әкімі басқарады. Жеке тұлғалардан алынатын мүлік, көлік, жер салықтарынан түскен қаржы бюджетті толық­тырады. Сол қаржы ауылдың инфра­құрылымын жаңартуға, көгалдандыру жұмыстарына жұмсалады. Әкім қаржыны өз еркімен басқара алмайды. Ауыл тұрғындарын жинап, кездесу өткізіп, белсенділермен ақылдасып, ең өзекті проблемаларды шешетін болады. qazaquni.kz