«ادام بولۋ – قاسيەت, ازامات بولۋ – مىندەت…»

4686
1
بولىسۋ:

(قايراتكەر قۋانىش ايتاحانوۆقا)

 

«التىن ۇياڭ – وتان قىمبات.
تۋىپ-وسكەن ەلىڭ قىمبات,
كىندىك كەسكەن جەرىڭ قىمبات».
قازىبەك بي

اساۋ وزەن ارناسىنداي ومىر كوشى زۋىلداپ وتىپ بارادى. دەگەنمەن, ار كۇننىڭ, ار ساتتىڭ الار ورنى بولەك. اق پەن قارا ارالاس تىرشىلىكتە بىردە كۇن كوزىندەي جىلىلىقتى سەزىنەسىڭ, ال بىردە سۋىعىنا توڭاتىنىمىز جاسىرىن ەمەس. «ومىر – بال مەن ۋدىڭ قوسىندىسى» دەگەن ەكەن بىر عۇلاما. بەكەر ايتىلماعان. بۇل جالعاننىڭ قادىرىن شىنايى ومىر سۇرگەن جان بىلەدى. قۇرمەت تە, ابىروي دا ەلىن سۇيگەن, جەرىن سۇيگەن, ادىل, وز سوزىنە بەرىك, جاۋاپكەرشىلىك جۇگىن تەرەڭ تۇسىنگەندەردى جاعالايتىنى انىق. ىشكى دۇنيەسىندە جارىعى بار ادام عانا اينالاسىنا شۋاق شاشا الادى. يا, قاراڭعىنى جارىق ەتۋ, ومىر سىنىنان اداسپاي وتۋ, جۇرەكتە ۇيالاعان ارمانعا جەتۋ ەكىنىڭ بىرىنىڭ قولىنان كەلە بەرمەس.

تاۋەلسىزدىكتىڭ تۋىن بيىك ۇستاپ, ەگەمەندىكتى نىعايتۋ, ماڭگىلىك ەل بولۋ جولىندا وز ۇلەسىن قوسىپ جۇرگەن, ومىرى ونەگەگە تولى اردا ازاماتتىڭ بىرى – قۋانىش اعا, وزىڭىز دەپ بىلەمىن.
قالەكە, مەنىڭ بۇرىننان قالىپتاسىپ قالعان بىر ادەتىم بار. وزىم جاقسى كورەتىن, جاقىنىما بالاعان ادامدارعا حات جازعىم كەپ تۇرادى. ويتكەنى حاتتا شىنايىلىق كورىنىس تابادى, جۇرەك تۇكپىرىندەگى ويلار قوزعالادى. مىنە, بۇگىن سونىڭ ساتى كەلگەندەي.
بالا كەزىمىزدە اتام جارىقتىق نەمەرە­لەرىنە شەشەندىك سوز جاتتاتاتىن. مىنا بىر ايتقان اڭگىمەسى ەسىمە تۇسىپ وتىر. سىرىمعا بوكەن بيبىلاي دەپ باتا بەرگەن ەكەن:
– ارقاڭ قارا نارداي جاۋىر بولسىن,
مىنەزىڭ قارا جەردەي اۋىر بولسىن.
وكپەڭ جوق, كەۋدەڭدە باۋىر بولسىن,
قۇلاعىڭنان سىبىر كەتپەسىن…
باتاسىن بەرگەننەن كەيىن «مەن نە دەسەم دە بارىنىڭ ماعىناسى بار. قالاي تۇسىندىڭ, وزىمە ايىرىپ بەر, – دەيدى بوكەن قارت.
سوندا سىرىم:
– ارقاڭ كوپ مىنگەننەن جاۋىر بولسىن دەگەنىڭ – حالىق ۇشىن جۇمىس جاسا, حالىقتى وزىڭە ەرتە بىل دەگەنىڭ. مىنەزىڭ قارا جەردەي اۋىر بولسىن دەگەنىڭ – بەرىدەن ويلاما, ارىدەن ويلا, سالماقتى بول, جەڭىل بولما دەگەنىڭ. وكپەڭ جوق, كەۋدەڭدە باۋىر بولسىن دەگەنىڭ – نە بولسا سوعان وكپەلەپ, ينەنى جىپكە تىزىپ, وكپەشىل بولما دەگەنىڭ. قۇلاعىڭنان سىبىر كەتپەسىن دەگەنىڭ – ەل اراسىندا داۋ-جانجال كوپ كەزدەسەدى. سول ماسەلەنى وزىڭ شەشىپ, اق-قاراسىن ايىرىپ, دۇرىس تورەلىگىن بەرە بىل دەگەنىڭ, – دەپتى.
يا, وسىنداعى ايتىلعان سوزدەردى, قالەكە, سىز قۇلاعىڭىزعا قۇيىپ وسكەننىڭ بەلگىسى شىعار, بوكەن قارتتىڭ باتا-تىلەگىندەي ەل اماناتىنا ادالدىعىڭىز, بولاتتاي بەرىكتىگىڭىز قاي كەزدە دە كورىنىس تاۋىپ كەلەدى. كەزىندە شاۋىلدىر كانالىن قازۋعا بەلسەنە قاتىسقان, سوندا العاشقىلاردىڭ بىرى بولىپ باۋ-باقشا وسىرگەن ايتاحان اقساقال دا تەگىن ادام بولماسا كەرەك. الى كۇنگە دەيىن وسىناۋ كانالدان بولىنگەن ارىقتىڭ «ايتاحان ارىق», ال باۋدىڭ «ايتاحان شارباعى» اتالۋى ونىڭ جۇرت الدىنداعى ابىرويىنىڭ بەلگىسى دەپ بىلەمىز. وسىنداي سەرگەك تە سەزىمتال, ارمانشىل, زەرەك بالانىڭ قاتارىنىڭ الدى بولىپ وسۋى – پاراساتتى اكەنىڭ, ايجامالداي اسىل انانىڭ عيبراتتى ومىرى مەن تالبەسىكتەن بەرگەن تاربيەسىنىڭ ناتيجەسى. ييا, تەكتىلىك قانمەن, تەرەڭ تاعىلىممەن كەلەدى.
قالەكە! اتىڭىزدى اتاعان سايىن شىنايىلىقتى, ىزگىلىكتى, جىلى شىرايدى سەزىنگەندەيمىن.سىز دۇنيە ەسىگىن اشقاندا اتا-انا ۇمىتىن اقتاسىن, اينالاسىنا شاتتىق سىيلاسىن دەپ ەسىمىڭىزدى «قۋانىش» دەپ قويسا كەرەك. بىر ۇيدىڭ ەمەس, بىر قاۋىم ەلدىڭ بالاسىنا اينالىپ, اكە ەسىمىن بيىككە كوتەرەر دەگەن ۇلكەن ۇمىت بۇگىندە تولىعىمەن اقتالعانىنا حالىق كۋا. ويتكەنى ايتاحانوۆ دەگەن تەكتى كوزى قاراقتى قازاقتىڭ بارى بىلەدى دەسەم قاتەلەسپەيمىن. وسى ورايدا قورقىت بابانىڭ مىنا سوزى ەسكە تۇسەدى. «ات جەمەيتىن اششى شوپتىڭ شىققانىنان شىقپاعانى يگى. ادام ىشپەس اششى سۋدىڭ اققانىنان اقپاعانى يگى. اتاسىنىڭ اتىن شىعارماعان جىگەرسىز ۇلدىڭ تۋعانىنان تۋماعانى يگى». قاي قيسىنعا سالساق تا, اتادان اسىل تۋىپ, ەل كەرەگىنە جاراعان ۇلدىڭ ار كەزدە دە ماڭدايى جارىق, الدى شامشىراق. ارتىنان بىز سەكىلدى ىنىلەر ەرسە, كورسەتەر باعىتى ايقىن, جولى جارقىن!
سىزدىڭ بالا كەزدەگى العا قويعان ماقساتىڭىزدىڭ بىرى – جۋرناليست بولۋ ەكەنىن كوپشىلىك بىلە بەرمەيدى. وتىرارداعى كەڭەس مەكتەبىندە ۇزدىك وقۋشى اتانىپ جۇرگەن كەزىڭىزدەن-اق بۇل ارمانىڭىز بۇرشىك اتىپ, قييالعا ساپار شەگەتىنسىز. قالامدى قولعا الىپ, اق پاراققا اقجەلكەن ويلارىڭىزبەن جول سالدىڭىز. گازەت مۇراعاتتارىن اقتارا قالساق, مەكتەپ وقۋشىسى قۋانىش ايتاحانوۆتىڭ اۋداندىق گازەتتە جيى جارييالانعان ماقالالارىن تاۋىپ الۋعا بولار ەدى. اتتەڭ, ومىردە بارى ادامنىڭ ويلاعانىنداي ەمەس قوي. تاعدىردىڭ كۇرت بۇرىلىستارى كوپ نارسەگە اسەرىن تيگىزبەي قويمايدى. اناڭىزدىڭ كەنەتتەن قايتىس بولۋىنا بايلانىستى ومىر جولىڭىز كۇرت وزگەردى. اعايىن-تۋىس اقىلداسىپ, ەرتەرەك بىلىم الىپ, اكەگە قولعانات بولۋىڭىزدى جون دەپ تاپتى. سودان جامبىل زووتەحنيكالىق-مالدارىگەرلىك تەحنيكۋمىنىڭ ستۋدەنتى اتاندىڭىز. مۇنىڭ بارى اۋىلعا قايتىپ كەلۋىڭىز ۇشىن جاسالعان قادامدار ەدى. وسىلايشا ەش ويىڭىزعا كىرىپ شىقپاعان, مۇلدە باسقا ارناعا قاراي بۇرىلىپ كەتە باردىڭىز. بويداعى قابىلەتتى سارقا پايدالاناتىن, وزىنە تالاپشىل مىنەزىڭىز تەحنيكۋمدا دا, سكريابين اتىنداعى ماسكەۋ ۆەتەرينارييا اكادەميياسىندا دا ايقىن كورىندى. مال دارىگەرلىك ماماندىقتى وقىپ جۇرگەنمەن, وز ارمانىڭىزدان قول ۇزبەي, قازاقستاننان قازاق تىلىندەگى باسپاسوزدى جازدىرتىپ الىپ, «لەنينشىل جاس» گازەتىنە تۇرلى تاقىرىپتا ماقالالار جارييالاپ تۇردىڭىز. قانداي قىزمەت اتقارساڭىز دا, كۇنى بۇگىنگە دەيىن كەز كەلگەن باياندامانى, گازەتتەرگە بەرىلەتىن ماقالالاردى وز قولىڭىزبەن جازاتىنىڭىز – سول كەزدەگى شىعارماشىلىققا دەگەن قۇشتارلىق پەن قۇداي بەرگەن دارىننىڭ كورىنىسى.
ادام قايدا جۇرسە دە اكە وسيەتىن ەستەن شىعارماۋ – تەكتىلىكتىڭ بەلگىسى. سوناۋ جامبىلداعى تەحنيكۋمعا اتتانارداعى ايتاحان اتامىزدىڭ مىنا بىر امانات سوزى ومىرلىك قاعيداڭىزعا اينالىپتى: «حالقىڭدى سۇي, ومىرىڭدى قادىرلە, تەك ادال جولدا جۇر!». ال جۇرەگى مەيىرىمگە تولى انا تىلەگى مىناداي ەدى: «بالام, ادىل بول, جاقسىدان عيبرات الا بىل, ازىپ تۋعاننان قا­شىق بول, وزىپ تۋعانعا اسىق بول!».
مىنە, وسى تۋرا باعىت, اكە مەن انانىڭ اماناتىنا ادالدىق سىزدى ومىر بيىگىنە كوتەردى. شىنىندا, ونەگەلى جولدا يگى ىستەرىڭىزگە سۇيسىنگەن ەل اعالارىنىڭ «كوسەگەڭ كوگەرسىن, باقىتتى بول!» دەپ ارقادان قاققان ايالى الاقاندارى كوڭىلگە قانات بىتىردى, كوكىرەككە سەنىم ۇيالاتتى. اتى اڭىزعا اينالعان باتىر باۋىرجان مومىشۇلىنىڭ «وز ۇلتىن سىيلاماۋ, ونى ماقتانىش ەتپەۋ –ساتقىندىقتىڭ بەلگىسى», «ۇشقىنسىز وت تۇتانباس», «انامىزدىڭ اق سۇتىمەن بويىمىزعا دارىعان تىلىمىزدى ۇمىتۋ – بۇكىل اتا-بابامىزدى, تاريحىمىزدى ۇمىتۋ» دەپ كەلەتىن قاناتتى سوزدەرى ومىرلىك كرەدوڭىزعا اينالدى. ەلىڭىزدەن جىراقتا جۇرسەڭىز دە بەسىگىڭىزدى, تىلىڭىزدى, دىلىڭىزدى ۇمىتقان جوقسىز.ونى ەلگە ەتكەن ەرەن ەڭبەگىڭىزدەن, ۇلتجاندى مىنەزىڭىزدەن بايقاپ كەلەمىن.
قالەكە! بۇگىنگى سىرلاسۋ حاتىم ايتەۋىر دارىپتەۋ, ماقتاۋعا قۇرىلعان جوق. مەنىڭ ماقساتىم – ەل قۇرمەتىنە بولەنۋ ۇشىن بۇگىنگى جاستار نە نارسەگە نازار اۋدارۋ كەرەك دەگەن وزەكتى ماسەلەنى قوزعاۋ. سىزدى جۇرتتىڭ سىيلاۋىنىڭ باستى سەبەبى نەدە؟ مىنە, وسى ارقىلى جاس بۋىنعا وي سالۋ, وتانعا دەگەن سۇيىسپەنشىلىكتىڭ نە ەكەنىن ۇقتىرۋعا ۇمتىلۋ. ۇلتتىڭ رۋحى – اسىل قاسيەت. ەڭ باستىسى – انا سۇتىن اقتاپ, تۋعان ەلدى, وتاندى سۇيۋ پارىز ەكەنىن ىسپەن, قابىلەتىڭىزبەن كورسەتىپ, تالانتىڭىزبەن تانىتتىڭىز. كەرتارتپا مىنەزدەردەن, جالقاۋلىقتان, پەسسيميستىك ويلاردان بويىڭىزدى اۋلاق ۇستاپ, ومىردىڭ ماقساتى العا ۇمتىلۋ ەكەنىن, ۇمىت قانا جۇرەكتەردى قۋانىشقا تولتىراتىنىن, سەنىم باردا الىنبايتىن اسۋ جوقتىعىن دالەلدەي بىلدىڭىز. ييا, وتاندى سۇيۋ –ناعىز ماحاببات. ول تەك ۇلكەن جۇرەكتى جانداردىڭ, ناعىز تۇلعالاردىڭ عانا قولىنان كەلەدى.
عۇلاما-عالىم ال-فارابيدىڭ «بىلىمدى بولۋ دەگەن سوزدىڭ ماعىناسى – بەلگىسىز نارسەنى اشۋعا قابىلەتتى بولۋ» دەگەن سوزى بار. وسى قاسيەتتى بويعا سىڭىرە بىلىپ, اسىپ-ساسپايتىن سابىرلى قالپىڭىز, جاڭا باستامالاردان قورىقپايتىن جىگەرىڭىز وز ورتاڭىزدا كوشباسشى اتاندىردى. ۇزدىك وقۋمەن قاتار عىلىمي جۇمىستارمەن دە كوزگە تۇستىڭىز. وسىلايشا 1967 جىلى ستۋدەنت كەزدىڭ وزىندە-اق ماسكەۋ قالاسىنىڭ جدانوۆ اۋدانى پارتييا كوميتەتىنىڭ شەشىمىمەن كپسس-قا مۇشەلىككە وتتىڭىز. بۇل ول كەزدە جۇزدىڭ بىرىنىڭ باسىندا بولا بەرمەيتىن ۇلكەن وقيعا ەدى. دال وسى پارتيياعا وتكەن جىلى عوي, ماسكەۋدە وقيتىن قازاق جاستارىنىڭ باسىن قوسىپ, «ارمان» اتتى ۇيىمدى قۇرۋعا كۇش سالدىڭىز. ونداعى ماقسات – وز وتانىنا دەگەن ماحابباتى ارتتىرۋ, عيبراتى مول ىس-شارالار ۇيىمداستىرۋ, وز بەسىگىڭدى قادىرلەۋ. ۇيىمنىڭ العاشقى باسقوسۋى قازان توڭكەرىسىنىڭ 50 جىلدىعى قارساڭىندا وتتى.
اكادەمييا كومسومول كوميتەتى يدەولوگييا جۇمىسىنا جاۋاپ بەرەتىن مۇشەسى رەتىندە كومسومول كوميتەتىنىڭ جىلدىق جوسپارىنا «ۆ براتسكوي سەمە نارودوۆ سسسر – سەگودنيا دەن كازاحستانا» دەگەن تاقىرىپپەن ىس شارا ەنگىزىپ, ماسكەۋدىڭ عانا ەمەس, لەنينگراد, كيەۆ, ريگا قالالارىندا وقيتىن قازاق ستۋدەنتتەرىنىڭ باسىن قوستىڭىز. ارادا تىعىز بايلانىس ورناتىلدى. قازاقستاندىقتار ارنايى كونتسەرت بەردى. ساحنادا قازاق اندەرى اۋەلەدى. قازاق اقىندارىنىڭ ولەڭدەرى وقىلدى. بۇل, راسىندا تۇسىنە بىلگەن ادامعا ۇلتقا دەگەن ماحابباتتى پاش ەتەتىن ارەكەت ەدى.
وسى ۇيىمنىڭ اتقارعان ەلەۋلى جۇمىستارىنىڭ بىرى – نەبارى 24 جاسىندا جاستاردىڭ كوممۋنيستىك-ينتەرناتسيونالىن باسقارىپ جۇرىپ, 1925 جىلى ماسكەۋدە قايتىس بولعان قازاقتىڭ اياۋلى پەرزەنتى ع.مۇراتباەۆتىڭ جەرلەنگەن جەرىن ىزدەپ تابۋى ەدى. ونداعى وي – الاساپىران زاماندا كوز جۇمعان قازاق پەرزەنتىنىڭ رۋحىنا تاۋ ەتىپ, باسىنا ەسكەرتكىش ورناتۋ بولاتىن. عانيمەن قىزمەتتەس بولعان ادامداردى ىزدەۋ كۇندەلىكتى جۇمىستاردىڭ بىرىنە اينالدى. ناتيجەسىندە ع.مۇراتباەۆتىڭ جەرلەنگەن جەرى ۆاگانكوۆسكايا قورىمىندا, تيميريازەۆ پەن پانفيلوۆتىڭ زيراتتارىنىڭ جانىندا ەكەنى انىقتالدى.
الدىمەن 1968 جىلى 29-قازاندا, تۋرا كومسومولدىڭ تۋعان كۇنىندە عاني زيراتىنىڭ باسىنا قازاقستاندىق ستۋدەنتتەردى جيناپ, ميتينگ وتكىزۋى, رۋحىنا قۇران باعىشتاۋى سول زاماندا تاۋەكەلگە تولى ىس ەدى. كەيىن بۇل باتىل باستاما داستۇرگە اينالدى.
ۇيىمنىڭ اتىنان سول كەزدەگى قازاقستان كومسومولى ورتالىق كوميتەتىنىڭ بىرىنشى حاتشىسى وزبەكالى جانىبەكوۆكە حات جازىپ, حاتتا ع.مۇراتباەۆتىڭ زيراتى تابىلعانى, ەندى سونىڭ باسىنا ەسكەرتكىش ورناتىلۋ كەرەكتىگى تۋرالى ايتىلدى. تىپتى, سىزدەر – ۇيىم مۇشەلەرى, ستۋدەنتتەر ەگەر ماسەلە شەشىلمەسە وز قالتالارىڭىزدان اقشا جيناپ, بەيىت باسىنا ەسكەرتكىش قويۋعا دايىن ەكەندىكتەرىڭىزدى دە ايقىن بىلدىردىڭىزدەر. 1971 جىلى قازاقستان تاراپىنان جۇمسالعان كوپ كۇش-جىگەر ناتيجەسىندە جاستاردىڭ كوشباسشىسىنىڭ باسىنا ەسكەرتكىش ورناتىلدى.
قالەكە! نەگە ەكەنىن قايدام, وزىڭىزدى ومىرباقي تانيتىن سيياقتىمىن. ال زەردەلەپ قاراسام, تۋرا 30 جىلداي ۋاقىت بولعان ەكەن. 1988 جىل 25-شىلدەدە قازاق كسر-نىڭ جوعارعى كەڭەس پرەزيديۋمىنىڭ جارلىعىمەن بوگەن اۋدانى(قازىرگى ورداباسى اۋدانى- ا.ى.) تاراتىلىپ, ارىس قالاسىنا قوسىلدى. ول كەزدە بورجاردا, اۋىل مەكتەبىندە فيزيكا پانىنىڭ مۇعالىمىمىن. سونىمەن قاتار مەكتەپ كومسومول ۇيىمىنىڭ حاتشىسىمىن, اۋداندىق «كوممۋنيزم تاڭى» گازەتى جانىنداعى قوسجان مۇسىرەپوۆ اتىنداعى ادەبيەت جانە ونەر بىرلەستىگىنىڭ جاۋاپتى حاتشىسىمىن. سىز شىمكەنت وبلىستىق اگروونەركاسىپ كوميتەتى توراعاسىنىڭ بىرىنشى ورىنباسارىنان اۋىلدىق ايماعى بار (بۇكىل بوگەن اۋدانىنىڭ جەرى) ارىس قالالىق پارتييا كوميتەتىنىڭ بىرىنشى حاتشىسى بولىپ سايلاندىڭىز. سوندا ۇلكەن ەل اعاسى بولىپ كورىندىڭىز. بۇگىندە قاراپ وتىرسام, بار-جوعى قىرىق جاستا ەكەنسىز. شىنىمدى ايتسام, وعان دەيىن اتى-جونىڭىزدى ەستىگەنىم بولماسا تىپتى تانىمايدى ەكەنمىن. ارادا بىراز ۋاقىت وتكەن سوڭ اۋداننان حابار كەلدى. «بىرىنشى حاتشى سىزدى شاقىرۋدا». ەرتەسىنە ارىس قالاسىنا جول تارتتىم.
– اكىم, اينالايىن, تورگە شىق. ەستىدىم, بوگەن اۋدانىنداعى ىس-شارالاردىڭ بارىن وزىڭ وتكىزەدى ەكەنسىڭ. اقىلداساتىن شارۋا بار.
سىز وتە جىلى شىرايمەن قارسى الدىڭىز. تۇسىنگەنىم – بۇرىن تىكەلەي تەمىرجول سالاسىنا باعىنعان, تىپتى ۋاقىتىنىڭ وزى ماسكەۋ ساعاتىمەن جۇرەتىن قالاعا سالت-داستۇرىمىزدى ەنگىزىپ, جاڭاشا باعىتتا ىس-شارالار وتكىزۋ قاجەت ەكەن. بىرىنشى رەت جاڭا اۋدان ورتالىعىندا ماقتاشىلار سلەتىن ۇيىمداستىرۋدى سول جولى ماعان جۇكتەدىڭىز. جاڭا باسشىنىڭ تالابى دا ەرەكشە بولدى. اۋىل مۇعالىمى, ماعان اۋداندىق پارتييا كوميتەتىنىڭ يدەولوگييا جونىندەگى حاتشىسى رايسا انتونوۆنا زاگورودنيكوۆانى, قالالىق اتقارۋ كوميتەتىنىڭ توراعاسىنىڭ ورىنباسارى جانەتتا يوسيپوۆنا كاليۋپانوۆانى, قالالىق مادەنيەت ۇيىنىڭ ديرەكتورى وسكەن بايىمبەتوۆتەردى كومەكشى رەتىندە تاپسىردىڭىز. ۋاقىت تىعىز. بار-جوعى ۇش-تورت كۇن. بۇرىنعى جاسالىپ قويعان ستسەنارييدىڭ بارىن وزگەرتىپ, مۇلدە بولەك باعدارلاما جاساپ شىعاردىم. جۇرگىزۋشىسى دە, رەجيسسەرى دە, ستسەناريي اۆتورى دا وزىم. ارىستا «رودينا» كينوتەاترىندا «شىن كوڭىلمەن» اتتى ماقتاشىلارعا ارنالعان مادەني كەش وتە جوعارى دەڭگەيدە وتتى. سىز سوندا زالدان شىعىپ, ەرەكشە ىقىلاستى پىكىرىڭىزدى جۇرتشىلىقتىڭ الدىندا ماعان بىلدىردىڭىز. بۇل ماعان قانات بىتىردى. وسى باعىتپەن تۋرا سول جەردە ارتىنشا اقىندار ايتىسىن وتكىزدىم. حالىقتىڭ ۇلتتىق ونەرگە سۋسىنداپ قالعانى سونشالىق, سىيماعانى زالعا ەسىكتى سىندىرىپ كىردى. ادەبيەتكە, ونەرگە, سالت-داستۇرگە دەگەن سۇيىسپەنشىلىگىڭىز جوعارى ەكەنىن سول كەزدە-اق تانىتتىڭىز. سول كەزدەگى جاستارعا, قوسجان مۇسىرەپوۆ اتىنداعى بىرلەستىك جۇمىسىنىڭ جاندانۋىنا قولداۋ كورسەتە بىلدىڭىز. ايتىڭىزشى, بۇدان سوڭ سىزدى قالاي جاقسى كورمەيمىز؟ بۇكىل اۋدان حالقى ناعىز باسشىنىڭ, حالىققا جاقىن ادامنىڭ كەلگەنىن سوندا سەزىندى.
1989 جىلى ارىس قالاسىندا بىرىنشى رەت ناۋرىز مەرەكەسىن دۇركىرەتىپ وتكىزگەنىڭىز دە ۇلكەن وقيعا بولىپ ەدى. سول كۇنى جازۋشىلار دۋلات يسابەكوۆ, سادىقبەك ادامبەكوۆ كەلىپ, سوز سويلەپ, ريزاشىلىقتان كوزدەرىنە جاس العان. مىنە حالىق ىقىلاسىن وسىلاي اۋداردىڭىز. ول حالىققا دەگەن شىنايى ماحابباتىڭىز ەدى! مۇنىڭ بارى كەنەستەر وداعى كەزىندە بولعان وقيعالار.
سەنات دەپۋتاتى اتانعان جىلدارىڭىزدا ەل مۇددەسى ۇشىن كوتەرگەن ماسەلەلەرىڭىزدىڭ بارلىعىنان دا سىزدىڭ ازاماتتىق بيىك پاراساتىڭىزدى ۇعامىز. ۇلگى الامىز. ۇقساۋعا تىرىسامىز. ىنى بولعانىمىزعا قۋانامىز. دارحان جۇرەگىڭىزدىڭ ۇزاق سوعۋىن قالايمىز.
وسىناۋ 30 جىلدان بەرى ىرگەمىز سوگىلىپ, اعا-ىنىلىك قاتىناسقا سەلكەۋ تۇسكەن ەمەس. قايتا ۋاقىت وتكەن سايىن بىر-بىرىمىزگە دەگەن تۋىستىق ىقىلاس ارتىپ كەلەدى.1997 جىلى 50 جىلدىق مەرەيتويىڭىزدا الماتىدان ارنايى كەلىپ, ماجىلىس دەپۋتاتى رەتىندە ۇيىمداستىرۋ كوميتەتىنىڭ مۇشەسى بولىپ ەدىم. الپىس جىلدىق تويىڭىزدىڭ دا وسى مىندەتتى اتقارۋ ابىرويى بۇيىردى. بۇگىن, مىنە, جەتپىستى باعىندىرعان شاعىڭىزدا دا ارنايى حات جازىپ, مەرەيتويىڭىزدى ۇيىمداستىرۋشىلار قاتارىندا جۇرمىن. باس امان بولىپ, سەكسەن جىلدىعىڭىزدا دا تىلەكشى بولۋدى اللادان تىلەيمىن.
«ادام بولۋ – قاسيەت, ازامات بولۋ – مىندەت, پاتريوت بولۋ – پارىز» دەگەن تاعىلىمدى تۇمار ەتىپ تاعىپ, تاۋەلسىز ەلدىڭ تارلان ازاماتى رەتىندە ايانىپ قالماعان تۇلعا قاشان دا قۇرمەتكە لايىق. بۇگىنگى ويلى جاس كىمگە ۇقساۋ كەرەك دەسە, ايتاحانوۆ بيىگىن ويلانباي نۇسقاپ كورسەتەر ەدىم.

قۇرمەتپەن, اكىم ىسقاق
قازاقستان رەسپۋبليكاسى پارلامەنتى ماجىلىسىنىڭ بىرىنشى شاقىرىلىمىنىڭ دەپۋتاتى, تۇڭعىش قازاق تىلىندە جازىلعان «حالىقتىڭ كوشى-قونى تۋرالى» زاڭىنىڭ
اۆتورى
استانا

qazaquni.kz

بولىسۋ:

Facebook ارقىلى جازىلعان پىكىرلەر

1 پىكىر جازىلعان

پىكىر نەمەسە جاۋاپ جازۋ