«العا, قازاق جىگىتتەرى!» توبى استاناعا اتتاندى

1674
0
بولىسۋ:

بۇگىن الماتىداعى بالۋان شولاق اتىنداعى سپورت كەشەنى الدىندا «ەكسپو-2017» كورمەسى اياسىندا استانادا وتەتىن كاسىپقوي بوكس كەشىنە ارنايى بارىپ, ەلىمىزدىڭ بىلعارى قولعاپ شەبەرلەرىن قولداۋ ماقساتىندا 50-گە تارتا بەلسەندى جاستار ارنايى اۆتوكولىكپەن اتتاندى. ۇراندارى — «العا قازاق, جىگىتتەرى!», – دەپ جازادى dalanews.kz.

وسى شارانى ۇيىمداستىرۋشى قىدىرالى ورازۇلىنىڭ ايتۋىنشا, قانات يسلام باستاعان ەل بوكسشىلارىنا قولداۋ بىلدىرىپ, جاستاردى ۇيىمشىلدىققا, وتانسۇيگىشتىككە ۇندەۋ ماقساتىندا اۆتوكەرۋەن جولعا شىققان. ولار جول بويى ەلىمىزدىڭ تاريحي نىساندارىنا توقتاپ, بۇل ساپاردان ەرەكشە ەستەلىك قالدىرۋدى جوسپارلاپ وتىرعاندارىن ايتادى.

ەرتەڭ ساعات كەشكى 18.00-دە استانادا حالىقارالىق كاسىپقوي بوكس جارىسى «سارىارقا» ۆەلوترەگىندە وتەدى. وعان ەلىمىزگە تانىمال بوكسشىلار قاتىسادى.

كەشتىڭ باستى جەكپە-جەگىندە قانات يسلام كانادالىق برەندون كۋكپەن كۇش سىناسادى. سونداي-اق, وتاندىق باسىلىمنىڭ مالىمەتتەرىنە سۇيەنسەك, استانادا وتەتىن بوكس كەشىندە جانقوش تۇراروۆ, جانىبەك الىمحانۇلى, مەيىرىم نۇرسۇلتانوۆ, رۋسلان مىرساتاەۆ, الي احمەدوۆ, ايدوس ەربوسىنۇلى, ديمان نييازوۆ جانە نۇرسۇلتان جاڭاباەۆ ونەر كورسەتەدى.

جاستار توبى بوكس كەشىنەن سوڭ 10 قىركۇيەك كۇنى وتەتىن «ەكسپو-2017» كورمەسىنىڭ جابىلۋ سالتاناتىنا دا قاتىسۋدى جوسپارلاپ وتىر.

بولىسۋ:

Facebook ارقىلى جازىلعان پىكىرلەر

پىكىر نەمەسە جاۋاپ جازۋ