ТҮГЕЛДЕН ТҮҢІЛДІК!

Әнуарлардың әлі күнге қазақ тілін «жетімсіз тіл» деп түсінетін жетесіздігінің шегіне жете алмай шаршадық...

Қазақ тілін, мәртебесі Ата Заңда айшықталып тұрып жазылған мемлекеттік тілді кемсітетін, кемсіту былай тұрыпты, күллі депуттардың көзінше ашықтан-ашық қорлайтындардың қатарына тағы бір пенде қосылды. Есімі – Әнуар, сойы – Түгел. Қызметі - Республикалық адвокаттар алқасында. Лауазымы - Республикалық адвокаттар алқасының төрағасы. «Ов»-ты фамилиясынан «отап» тастағанына қарап осы бір азаматқа ішіміз жылып, бүйрегіміз бұрып жүруші еді. Сөйтсек, Әнекеңнің мемлекетшілідігі әншейін ғана бірдеңе көрінеді. Егер ол шын патриот, отаншыл, халықшыл азамат болса, Парламенттің Мәжілісінде «Нотариат және адвокатура институттарын одан әрі дамыту және реформалау» тақырыбында өткен үкімет сағатында депутаттың сұрағына жауап қайтара отырып  «Прошу ответиь на русском языке. Так будет доступней» демес еді. Алайда ол деді. Дегенде, депутат Сауытбек Әбдірахмановқа солай айтты. Адвокаттар алқасының төрағасы әлгіндей деп шалқайған соң оған депутат былай деп кейістігін білдірді:

«Менің сұрағым тілек түрінде болады. Республикалық адвокаттар алқасының төрағасы Әнуар Түгелге. Депутаттың сұрағына жауап қайтара отырып сіз «Прошу ответиь на русском языке. Так будет доступней» дедіңіз. Бұл сөзіңізді қалай түсінуге болады? Депутат Магеррамовтың сұрағына жауап қайтарған кезде де солай сөйледіңіз. Сонда сіздің пікіріңізше, жауапты қазақ тілінде қайтарғанда ойды «доступно» жеткізудің мүмкіндігі жоқ па? Қазақ тілін кемсітіп сөйлемеуді сұраймын».

Қысқасы, Түгелден түңілдік. Әнуарлардың әлі күнге қазақ тілін «жетімсіз тіл» деп түсінетін жетесіз ойлары мен түнек басқан саналарының шегіне жете алмай шаршадық. Халқым-ау, айтыңдаршы, бұларға енді не деуге болады?

Әділжан Қырымжан

Abai.kz