724
0
Bólisý:

Tólebı aýdanynyń «Qazaqstan» eldi mekeninde ornalasqan, mal sharýashylyǵy bıznesin 2012 jyly bastaǵan, búginde oblystaǵy osy sala boıynsha irgeli kompanııalardyń biri bolyp sanalatyn «ADS agro» JShS-inde 1500 iri qara, 400 jylqy bordaqylanýda. Bıyl buqa sanyn 3 myńǵa jetkizý josparlanyp otyr. Sonymen qatar, «Tólebı sút» kooperatıvin quryp, sharýalardan jınaǵan sútti aýyldaǵy «Fýdmaster» kompanııasyna ótkizgeli jatyr. Sharýashylyqta etti-sútti Sımmental tuqymdy iri qara ósiriledi. Seriktestik quryltaıshysy D.Aqtaevtyń aıtýynsha, asyl tuqymdy túliktiń erkegi bordaqylanyp, etke soıylady da, urǵashysy mal sanyn kóbeıtýge jumsalady.

Munymen qosa sharýashylyq 50 gektar jerge ekken qarqyndy baýdy bıyl taǵy 40 gektarǵa ulǵaıtýdy kózdese, keleshekte baý kólemin 300 gektarǵa jetkizbek nıette. Alasa boıly jemis aǵashtary 2 jylda ónim beredi. Al, 5 jylda naǵyz kemeline enedi. Osyndaı qarqyndy baýdyń 1 gektarynan 50-70 tonna aralyǵynda ónim alýǵa bolady.
D.Aqtaevtyń pikirinshe, úlestik jeri bar azamattardyń kópshiligi aýyl sharýashylyǵymen aınalyspaıdy. Egistikti eshkimge bergisi kelmeıdi, ózderi de eshnárse ekpeıdi. Sondyqtan «ADS agro» sharýalardyń basyn biriktirip, baý sharýashylyǵy boıynsha kooperatıv qurmaq.
Kompanııa aptasyna 2 ret 10 tonnadan Almaty qalasyna et ótkizedi. Aıyna 80 tonna iri qara, 20-25 tonna jylqy, 20 tonna qoı etin saýdalaıdy. Aýylda mal ustaıtyn azamattar qoıyn osynda ákep soıyp satady. Egin sharýashylyǵy jóninen kooperatıv quryp, 1300 gektarǵa arpa, jońyshqa, bıdaı egip, 84 múshesine tıisti paılaryn berip otyr. Agrarlyq jumystar 43 tehnıkanyń kómegimen atqarylady.
Sonymen qatar, mal bordaqylaý boıynsha da sharýalardy kooperatıvke biriktirý kózdelýde. Eger 3-4 myń iri qara bordaqylansa, onda oblystan ózge jerlerge de joǵary baǵamen satýǵa múmkindik týady. Sondyqtan sharýashylyq et óndirisin kóbeıtý maqsatynda jumys júrgizip jatyr.
«ADS agro» joǵaryda aıtqan Sımmental tuqymdy iri qaradan 1000 qunajyn satyp alypty. Kelesi jyly olar tóldese, turǵyndardyń malyn qosqanda 1500 sıyr saýylatyn bolady. Osylaısha sút óndirisin damytýdy da josparlap otyr.
– Bizdiń mal bordaqylaý keshenimiz II dárejeli bolǵandyqtan, ettiń ár kelisine 170 teńgeden sýbsıdııa alamyz. Buryn ákimdik jumysynda qaǵazbastylyq kóp bolýshy edi. Qazir ákimdiktegilerdiń ózderi habarlasyp, sýbsıdııa alýdyń ýaqyty kelgenin aıtyp, eskertip otyrady. Memlekettiń osyndaı qamqorlyǵy úshin biz de óz tarapymyzdan sharýashylyqty órkendetýge barynsha tyrysyp jatyrmyz. Eń bastysy, halyqqa paıdamyzdy tıgizip, eldiń saýabyn alý, – deıdi D.Aqtaev.
Sharýashylyq óz qarajaty esebinen 200 myń dollarǵa Túrkııadan kóń shashatyn, soıylǵan mal qaldyqtaryn tazalaıtyn, jemis aǵashtaryn dárileıtin jáne sol sekildi tehnıka túrlerin satyp ákelipti. Desek te aldaǵy ýaqytta memlekettiń kómegi arqyly ózge de tehnıkalar satyp almaq oıda. Máselen, kooperatıvterge tehnıka alýǵa jumsalǵan qarajattyń 30 paıyzy qaıtarylyp beriledi nemese jyldyq mólsherlemesi arzan paıyzben nesıe alýǵa múmkinshilik bar.
– Negizinen alyp qaraǵanda, aýyl sharýashylyǵy keremet rentabeldi, ıaǵnı tabysy mol salaǵa jatpaıdy. Iаǵnı, barlyq elde agrosektor tek dotasııanyń kómegimen ǵana ómir súrip kele jatyr. Qazaqstan 2020 jylǵa qaraı Dúnıejúzilik saýda uıymynyń tolyqqandy músheligine kiredi. Sol kezde DSU-nyń sharty boıynsha tikeleı sýbsıdııa berý toqtatylady. Sol úshin qazir aýyl sharýashylyǵyn damytýǵa barynsha qarajat jumsap qalýymyz kerek. Sonymen birge, ettiń ózindik qunyn múmkindiginshe tómendetý de mańyzdy. О́ıtkeni, erteń Brazılııa, Argentınadan elimizge arzan et kelse, ózimizdiń ónimdi óz naryǵymyzda satý qıyndap qalýy múmkin. Sondyqtan, memlekettiń sharýalarǵa kórsetip jatqan búgingi qoldaýyna óte rızamyn jáne osy jeńildikterdi paıdalanýda aıanyp qalmaýymyz kerek, – deıdi ol.

Altynbek Sahabat

qazaquni.kz

Bólisý:

Facebook arqyly jazylǵan pikirler

Pikir nemese jaýap jazý

5 + 1 =