726
0
بولىسۋ:

تولەبي اۋدانىنىڭ «قازاقستان» ەلدى مەكەنىندە ورنالاسقان, مال شارۋاشىلىعى بيزنەسىن 2012 جىلى باستاعان, بۇگىندە وبلىستاعى وسى سالا بويىنشا ىرگەلى كومپانييالاردىڭ بىرى بولىپ سانالاتىن «ادس اگرو» جشس-ىندە 1500 ىرى قارا, 400 جىلقى بورداقىلانۋدا. بيىل بۇقا سانىن 3 مىڭعا جەتكىزۋ جوسپارلانىپ وتىر. سونىمەن قاتار, «تولەبي سۇت» كووپەراتيۆىن قۇرىپ, شارۋالاردان جيناعان سۇتتى اۋىلداعى «فۋدماستەر» كومپانيياسىنا وتكىزگەلى جاتىر. شارۋاشىلىقتا ەتتى-سۇتتى سيممەنتال تۇقىمدى ىرى قارا وسىرىلەدى. سەرىكتەستىك قۇرىلتايشىسى د.اقتاەۆتىڭ ايتۋىنشا, اسىل تۇقىمدى تۇلىكتىڭ ەركەگى بورداقىلانىپ, ەتكە سويىلادى دا, ۇرعاشىسى مال سانىن كوبەيتۋگە جۇمسالادى.

مۇنىمەن قوسا شارۋاشىلىق 50 گەكتار جەرگە ەككەن قارقىندى باۋدى بيىل تاعى 40 گەكتارعا ۇلعايتۋدى كوزدەسە, كەلەشەكتە باۋ كولەمىن 300 گەكتارعا جەتكىزبەك نيەتتە. الاسا بويلى جەمىس اعاشتارى 2 جىلدا ونىم بەرەدى. ال, 5 جىلدا ناعىز كەمەلىنە ەنەدى. وسىنداي قارقىندى باۋدىڭ 1 گەكتارىنان 50-70 توننا ارالىعىندا ونىم الۋعا بولادى.
د.اقتاەۆتىڭ پىكىرىنشە, ۇلەستىك جەرى بار ازاماتتاردىڭ كوپشىلىگى اۋىل شارۋاشىلىعىمەن اينالىسپايدى. ەگىستىكتى ەشكىمگە بەرگىسى كەلمەيدى, وزدەرى دە ەشنارسە ەكپەيدى. سوندىقتان «ادس اگرو» شارۋالاردىڭ باسىن بىرىكتىرىپ, باۋ شارۋاشىلىعى بويىنشا كووپەراتيۆ قۇرماق.
كومپانييا اپتاسىنا 2 رەت 10 توننادان الماتى قالاسىنا ەت وتكىزەدى. ايىنا 80 توننا ىرى قارا, 20-25 توننا جىلقى, 20 توننا قوي ەتىن ساۋدالايدى. اۋىلدا مال ۇستايتىن ازاماتتار قويىن وسىندا اكەپ سويىپ ساتادى. ەگىن شارۋاشىلىعى جونىنەن كووپەراتيۆ قۇرىپ, 1300 گەكتارعا ارپا, جوڭىشقا, بيداي ەگىپ, 84 مۇشەسىنە تيىستى پايلارىن بەرىپ وتىر. اگرارلىق جۇمىستار 43 تەحنيكانىڭ كومەگىمەن اتقارىلادى.
سونىمەن قاتار, مال بورداقىلاۋ بويىنشا دا شارۋالاردى كووپەراتيۆكە بىرىكتىرۋ كوزدەلۋدە. ەگەر 3-4 مىڭ ىرى قارا بورداقىلانسا, وندا وبلىستان وزگە جەرلەرگە دە جوعارى باعامەن ساتۋعا مۇمكىندىك تۋادى. سوندىقتان شارۋاشىلىق ەت وندىرىسىن كوبەيتۋ ماقساتىندا جۇمىس جۇرگىزىپ جاتىر.
«ادس اگرو» جوعارىدا ايتقان سيممەنتال تۇقىمدى ىرى قارادان 1000 قۇناجىن ساتىپ الىپتى. كەلەسى جىلى ولار تولدەسە, تۇرعىنداردىڭ مالىن قوسقاندا 1500 سيىر ساۋىلاتىن بولادى. وسىلايشا سۇت وندىرىسىن دامىتۋدى دا جوسپارلاپ وتىر.
– بىزدىڭ مال بورداقىلاۋ كەشەنىمىز ىى دارەجەلى بولعاندىقتان, ەتتىڭ ار كەلىسىنە 170 تەڭگەدەن سۋبسيدييا الامىز. بۇرىن اكىمدىك جۇمىسىندا قاعازباستىلىق كوپ بولۋشى ەدى. قازىر اكىمدىكتەگىلەردىڭ وزدەرى حابارلاسىپ, سۋبسيدييا الۋدىڭ ۋاقىتى كەلگەنىن ايتىپ, ەسكەرتىپ وتىرادى. مەملەكەتتىڭ وسىنداي قامقورلىعى ۇشىن بىز دە وز تاراپىمىزدان شارۋاشىلىقتى وركەندەتۋگە بارىنشا تىرىسىپ جاتىرمىز. ەڭ باستىسى, حالىققا پايدامىزدى تيگىزىپ, ەلدىڭ ساۋابىن الۋ, – دەيدى د.اقتاەۆ.
شارۋاشىلىق وز قاراجاتى ەسەبىنەن 200 مىڭ دوللارعا تۇركييادان كوڭ شاشاتىن, سويىلعان مال قالدىقتارىن تازالايتىن, جەمىس اعاشتارىن دارىلەيتىن جانە سول سەكىلدى تەحنيكا تۇرلەرىن ساتىپ اكەلىپتى. دەسەك تە الداعى ۋاقىتتا مەملەكەتتىڭ كومەگى ارقىلى وزگە دە تەحنيكالار ساتىپ الماق ويدا. ماسەلەن, كووپەراتيۆتەرگە تەحنيكا الۋعا جۇمسالعان قاراجاتتىڭ 30 پايىزى قايتارىلىپ بەرىلەدى نەمەسە جىلدىق مولشەرلەمەسى ارزان پايىزبەن نەسيە الۋعا مۇمكىنشىلىك بار.
– نەگىزىنەن الىپ قاراعاندا, اۋىل شارۋاشىلىعى كەرەمەت رەنتابەلدى, ياعني تابىسى مول سالاعا جاتپايدى. ياعني, بارلىق ەلدە اگروسەكتور تەك دوتاتسييانىڭ كومەگىمەن عانا ومىر سۇرىپ كەلە جاتىر. قازاقستان 2020 جىلعا قاراي دۇنيەجۇزىلىك ساۋدا ۇيىمىنىڭ تولىققاندى مۇشەلىگىنە كىرەدى. سول كەزدە دسۇ-نىڭ شارتى بويىنشا تىكەلەي سۋبسيدييا بەرۋ توقتاتىلادى. سول ۇشىن قازىر اۋىل شارۋاشىلىعىن دامىتۋعا بارىنشا قاراجات جۇمساپ قالۋىمىز كەرەك. سونىمەن بىرگە, ەتتىڭ وزىندىك قۇنىن مۇمكىندىگىنشە تومەندەتۋ دە ماڭىزدى. ويتكەنى, ەرتەڭ برازيلييا, ارگەنتينادان ەلىمىزگە ارزان ەت كەلسە, وزىمىزدىڭ ونىمدى وز نارىعىمىزدا ساتۋ قيىنداپ قالۋى مۇمكىن. سوندىقتان, مەملەكەتتىڭ شارۋالارعا كورسەتىپ جاتقان بۇگىنگى قولداۋىنا وتە ريزامىن جانە وسى جەڭىلدىكتەردى پايدالانۋدا ايانىپ قالماۋىمىز كەرەك, – دەيدى ول.

التىنبەك ساحابات

qazaquni.kz

بولىسۋ:

Facebook ارقىلى جازىلعان پىكىرلەر

پىكىر نەمەسە جاۋاپ جازۋ

4 × بىر =