مينيسترلەر نەگە باستى ماسەلەنى سوز ەتپەي, ون سوتىق جەردىڭ اينالاسىندا جۇر؟

1486
15
بولىسۋ:

013وتكەندە پارلامەنت ماجىلىسى «ەدەل-جەدەل» ماقۇلداعان «قر جەر كودەكسىنىڭ كەيبىر نورمالارىنىڭ جۇمىسىن توقتاتۋ تۋرالى زاڭدى سەنات تا قابىلداپ «ۇلگەردى». بۇل زاڭ جوباسىن جاساۋعا پرەزيدەنتتىڭ 2016 جىلدىڭ 6 مامىرىنداعى «جەر زاڭناماسىنىڭ كەيبىر نورمالارىن قولدانۋعا موراتوريي ەنگىزۋ تۋرالى» جارلىق سەبەپ بولعانىن جازعان ەدىك.

مەملەكەت باسشىسىنىڭ جارلىعىنا سايكەس, جەر كودەكسىنىڭ كەيبىر نورمالارىنا موراتوريي ەنگىزىلگەن-دى. قىسقاشا ايتساق, بۇل زاڭ سول موراتورييدى كۇشىنە ەنگىزەدى.  

«ەدەل-جەدەل» دەگەن تىركەستى تىرناقشاعا الۋىمىزدىڭ سەبەبى بار. بىزدىڭ زاڭ شىعارۋشى ورگاندار ەكى ايعا جۋىق ۋاقىتتىڭ ىشىندە پرەزيدەنتتىڭ جارلىعىن ارەڭ زاڭداستىرىپ بەردى. ەلباسىنىڭ جارلىعىن كۇشىنە ەنگىزۋگە وسىنشاما ۋاقىت جۇمساعان جايباسار شەندىلەرىمىز اينالدىرعان 4-5 ايدىڭ ىشىندە حالىقتىڭ كوڭىلىنەن شىعاتىنداي ەتىپ جەر كودەكسىنە وزگەرتەدى دەي الامىز با؟ ەندىگى قويىلار سۇراق وسى…

سەناتتىڭ اتى سەنات ەمەس پە؟ وسى جولى زاڭدى تالقىلاۋ بارىسىندا بىرلى-جارىم سەناتورلار اۋىل شارۋاشىلىعى ۆيتسە-مينيسترى ەرلان نىسانباەۆقا سۇراقتار قويعان بولدى. سول سۇراقتىڭ بىرىنە نىسانباەۆ مىرزا بىلاي دەپ جاۋاپ بەردى:

ەرلان نىسانباەۆ, اۋىل شارۋاشىلىعى ۆيتسە-مينيسترى:

– ەگەر بىزدىڭ جەدەل جەلىگە تۇسىپ جاتقان قوڭىراۋلاردى تالداساق, وندا ون مىڭنان استام سۇراقتار مەن ۇسىنىستار كەلىپ تۇسكەنىن كورىپ وتىرمىز. بۇدان بولەك, جەر تۋرالى سايت اشىلعان بولاتىن, وندا مىڭداعان سۇراقتار كەلىپ تۇستى. وسىنىڭ بارىنە دە جاۋاپتار بەرىلۋى تيىس. ەڭ باستىسى, جەر ماسەلەلەرىنە قاتىستى بىرىڭعاي ورتاق پىكىر الى قالىپتاسقان جوق. دەسە دە, وتكەن شارالاردىڭ قورىتىندىلارى بويىنشا جۇما كۇنى جۇمىس توپتارى قايتادان باس قوسا باستايدى. مىنە, وسى جۇمىس توپتارىنىڭ ناتيجەسىندە بىز كەلىپ تۇسكەن سۇراقتار بويىنشا تالداۋ جۇمىستارىن جاسايتىن بولامىز. ەڭ قىزىعى سۇراقتاردىڭ سەكسەن پايىزى جەر رەفورماسىنا قاتىستى ەمەس. ولاردىڭ دەنى ون سوتىق جەر الۋعا بايلانىستى بولىپ وتىر. سۇراقتاردىڭ بەس-التى پايىزى جەر رەفورماسىنا قاتىستى, قالعانى باسقا ماسەلەلەر. سوندىقتان دا, قانداي دا بىرىڭعاي ورتاق پىكىردىڭ قالىپتاسقانى تۋرالى ايتۋعا ەرتەرەك.

ۆيتسە-مينيستردىڭ «ەڭ قىزىعى سۇراقتاردىڭ سەكسەن پايىزى جەر رەفورماسىنا قاتىستى ەمەس. ولاردىڭ دەنى ون سوتىق جەر الۋعا بايلانىستى بولىپ وتىر» دەگەن سوزىنەن نەنى ۇعامىز؟

بىرىنشىدەن, اتىراۋداعى  ميتينگ وتكەن سوڭ, ەلباسىمىز جەردى قورعايتىن وسىنشا حالىق بارىنا قۋانىپ: «اعايىننىڭ جەرگە دەگەن كوڭىلى وسىنداي بولىپ قالا بەرسە, وندا حالقىمىز قاسىق قانى قالعانشا جەرىمىزدى قورعايدى دەپ بىلەمىن» دەگەن ەدى.

نىسانباەۆ مىرزا, ەلباسىنىڭ سول قۋانىشىن كوپ كورىپ وتىر ما؟

ەلباسى سەنىم ارتقان حالىق 10 سوتىق جەر ۇشىن ميتينگكە شىققان جوق. مۇنى بەسىكتەگى بالا دا بىلەدى. ولار جەكە باستىڭ مۇددەسى ۇشىن ەمەس, كەلەر ۇرپاقتىڭ ەرتەڭى ۇشىن «جەر شەتەلدىكتەرگە جالعا بەرىلمەسىن» دەپ وز ويىن الاڭعا شىعىپ, بەيبىت شەرۋ وتكىزىپ, بىلدىردى. ەندى جەدەل جەلىنى جەلەۋ ەتىپ, حالىقتىڭ سول ويىن باسقا ارناعا «بۇرۋ» نە ۇشىن كەرەك بولا قالدى؟

ەكىنشىدەن, قازاقستاننىڭ ار ايماعىندا بولعان بەيبىت شەرۋدىڭ ەشقايسىسىنىڭ باستى تالابى 10 سوتىق جەر الۋ بولعان جوق. بارلىعى دا شەتەلدىكتەرگە جەر بەرمەۋدى ۇران ەتتى. ال, 10 سوتىقتىڭ داۋى ميتينگتەردەن سوڭ باستالدى. سوڭعى ۋاقىتتاعى رەسمي ورگانداردىڭ جۇمىسىنىڭ بەتالىسىنا قاراساڭىز حالىقتىڭ نازارىن وسى 10 سوتىق جەرگە اۋدارىپ, باستى ماسەلەنى ەكىنشى ورىنعا ىسىرىپ تاستاعىسى كەلەتىنىن بايقايسىز.

ۇشىنشىدەن, ۆيتسە-مينيستر «سۇراقتاردىڭ بەس-التى پايىزى جەر رەفورماسىنا قاتىستى» دەۋ ارقىلى جەر رەفورماسىنىڭ سونشالىق ماڭىزدى ەمەس ەكەنىن ايتقىسى كەلىپ وتىر ما؟ الدىمەن «سەكسەن پايىز حالىق ون سوتىق جەر سۇراپ وتىر» دەپ الىپ, قالعان جيىرما پايىزدى دا «ميتينگىشىلەرگە», ياعني ەلباسى سەنىم ارتقان حالىققا قيماۋدىڭ استارىندا نە بار؟ راسىندا, جەدەل جەلىگە كەلگەن اقپاراتتار ۆيتسە-مينيستر ايتقانداي-اق بولسىن! ول قوڭىراۋلاردىڭ بارلىعى قوسىلسا دا, بىر بەيبىت ميتينگكە تاتىمايتىنى بەلگىلى عوي.

بۇل از ساندى توپتىڭ ماسەلەسى بولسا, حالىققا ميتينگىلەتىپ نە كەرەك ەدى؟

ەلباسىمىز موراتريي جارييالاپ نەگە اۋرە بولدى؟

جەر كوميسسيياسى كۇلتوبەنىڭ باسىندا كۇندە جيىن وتكىزىپ نەسى بار؟

حالىققا تۇرعىن ۇي سالۋعا ون سوتىق جەر ۇسىنىپ, شەتەلدىكتەرگە قازاقتىڭ بار جەرىن ۇلەستىرىپ بەرە سالماي ما؟

تورتىنشىدەن, بىزدىڭ قۇزىرەتتى ورگاندار وزدەرىنىڭ قولىمەن جاساعان «وتىرىگىنە» وزدەرى سەنىپ قالاتىن بولعانى ما؟ حالىق ميتينگ ارقىلى وز ويىن ايتىپ بولىپ, ەندى كوميسسيياعا ۇمىت ارتىپ وتىر. ولار سول بىر ايتقان سوزدى ەكىنشى رەت جەدەل جەلىگە قايتالاپ ايتاتىن توتىقۇس ەمەس قوي. مۇنى ۆيتسە-مينيسترىمىز بىلمەي وتىر ما؟

نىسانباەۆتى ايتىپ وتىرىپ, ونىڭ باسشىسى قر اۋىل شارۋاشىلىعى مينيسترى اسقار مىرزاحمەتوۆتى دە «سىباعاسىز» قالدىرۋعا بولمايدى.

شىنىن ايتۋ كەرەك, ەلباسىمىز دا, حالىق تا اسقار مىرزاحمەتوۆكە سەنىم ارتىپ وتىر.

سول سەنىم ارتقان اسقار مىرزا دا بۇگىندە جەكە ۇي قۇرىلىسىنا قاجەتتى جەر تەلىمدەرى تاپشى ەكەنىن ايتا كەلىپ: «اتالعان ماسەلەنى شەشۋ ۇشىن اۋىل شارۋاشىلىعى جەرلەرىن مەملەكەت مەنشىگىنە ساتىپ الىپ, حالىققا 10 سوتىقتان تاراتىپ بەرۋگە بولادى» دەپتى. مۇنىمەن قوسا مينيسترى ەلىمىزدەگى 10 سوتىق جەردى العىسى كەلەتىندەردىڭ سانى 1 ميلليون 400 مىڭ ادامنان اسىپ وتىرعانىن جەتكىزگەن.

مىرزاحمەتوۆ مىرزانىڭ كۇشى 1 ميلليون 400 مىڭ ادامعا ۇلكەن قالالار ماڭىنان ون سوتىق جەر تاۋىپ بەرۋگە جەتە مە؟ ارينە, جوق. ەندەشە مينيسترلەر نەگە باستى ماسەلەنى سوز ەتپەي, ون سوتىق جەرگە جابىسا قالدى. جاۋاپتى وزدەرى بەرە جاتار…

تۇيىن

نەگىزى پرەزيدەنتىمىز نۇرسۇلتان نازارباەۆ جەر كودەكسى مەن رەفورمانى تالقىعا سالۋدى بۇيىردى. ال, ماعان بىزدىڭ شەندىلەر جوعارىداعى دەرەكتەر ارقىلى «بىر ماسەلەنىڭ بەتىن جىلى جابامىن» دەپ, ەكىنشى پروبلەمانىڭ شوعىن وز قولىمەن كوسەپ جاتقانداي كورىنەدى…

قانات بىرلىكۇلى

Abai.kz 

بولىسۋ:

Facebook ارقىلى جازىلعان پىكىرلەر

سايتتا 15 پىكىر جازىلعان

  1. ەسەنعالي, انتاكييادان 24 ماۋسىم, 2016 10:28 جاۋاپ

    … «ال, ماعان بىزدىڭ شەندىلەر جوعارىداعى دەرەكتەر ارقىلى /بىر ماسەلەنىڭ بەتىن جىلى جابامىن/ دەپ, ەكىنشى پروبلەمانىڭ شوعىن وز قولىمەن كوسەپ جاتقانداي كورىنەدى …»
    *****************************************************************************************************
    كوسەمدەرى كوسەۋشى بولسا, ول شوپكەتىشارلار شوق كوسەمەي قايتەدى, قانات باۋىرىم ؟ !
    :oilanu: :kulki1: :oilanu:

  2. انونيم 24 ماۋسىم, 2016 12:57 جاۋاپ

    نەگىزى جەر ماسەلەسى ەشقانداي ميتينگىسىز مادەني تۇردە شەشىلىپ جاتقانى قۋانتادى

  3. كارلىگاش 24 ماۋسىم, 2016 12:58 جاۋاپ

    بارىمىز دە مىرزاحمەتوۆكە سەنىم ارتىپ وتىرمىز, وعان دەيىن باقىتجان اعامىز دۇرىس جولعا سالىپ كەتكەن كوميسسييا مۇشەلەرى حالىقتىڭ كوڭىلىنەن شىعاتىن شەشىم شىعارادى دەپ سەنەمىن

  4. ۋميت 24 ماۋسىم, 2016 12:58 جاۋاپ

    مىرزاحمەتوۆ دۇرىس تۇسىنىكتەمە بەردى, جەر بەرىلگەنمەن, ينفراسترۋكتۋرا جوق, جانە وعان قارجى دا جوق, سول ۇشىن سابىرلىق تانىتىپ كۇتە تۇرۋ كەرەك

  5. گۋلميرا 24 ماۋسىم, 2016 12:59 جاۋاپ

    حاميتپەن كەلىسەمىن, 10 سوتىق جەر بەرىلسە حالىقتىڭ بيلىككە دەگەن سەنىمى ارتار ەدى

  6. بۋلبۋل 24 ماۋسىم, 2016 13:00 جاۋاپ

    ول 10 سوتىق جەر ۇشىن ەمەس ەكەنى بەلگىلى عوي, حالىققا دۇرىس اقپارات جەتپەدى سول ۇشىن شىقتى, ال ەندى كوميسسييا دۇرىس اقپاراتتاندىرۋ ۇشىن قۇرىلدى ەمەس پە

  7. دانا 24 ماۋسىم, 2016 17:23 جاۋاپ

    بارىمىز دە مىرزاحمەتوۆكە سەنىم ارتىپ وتىرمىز, وعان دەيىن باقىتجان اعامىز دۇرىس جولعا سالىپ كەتكەن كوميسسييا مۇشەلەرى حالىقتىڭ كوڭىلىنەن شىعاتىن شەشىم شىعارادى دەپ سەنەمىن

  8. باتيما 24 ماۋسىم, 2016 17:25 جاۋاپ

    جەر كوميسسيياسىنىڭ شەشىمىن سابىرلىقپەن كۇتەيىك اعايىن. ەلىمىزدە تىنىشتىق بولسىن!

  9. قازاقييا 25 ماۋسىم, 2016 07:46 جاۋاپ

    25 جىلدا بۇقارا حالىقتى ساياساتتان ىعىستىرىپ, زومبيعا اينالدىرعانى كورىنىپ-اق تۇر, سول 10 سوتىق, بيلىكتىڭ ارام نيەتىن جۇزەگە اسىرۋىنا جاقسى «تيەك» بولعالى تۇر. سول سەبەپتى دە 25 جىل بويى حالىققا كوشباسشى بولاتىن قوعامدىق ۇيىمدار مەن كوزى اشىق ازاماتتاردى ولتىردى,قامادى,ەل اسىرىپ قۋىپ جىبەردى,تۇنشىقتىردى. ەندى, تاۋىققا جەم شاشقانداي, 10 سوتىقتى تاراتىپ, قالعان ۇلكەن قازاق جەرىن «دوللارعا» ايىرباستاپ قاشۋعا بولادى…

  10. قازاق 25 ماۋسىم, 2016 17:31 جاۋاپ

    مەنىڭ تۇسىنبەيتىنىم, ون سوتىق جەر نەگە سونشا پروبلەما قىلادى, جەردى بول, وعان تارتاتىن توگى, سۋى, گازى تاعى نە كەرەك, سونىڭ بəرىنىڭ اقشاسىن شىعار, ايتالىق مىڭ سوتىق جەرگە وسى كوممۋنيكاتسييالاردى جاساۋعا ملن-داعان اقشا كەرەك دەيىك, سونى سوتكاعا بولدە, تيەسىلى باعاسى شىققان سوڭ, حالىققا بەر, تاك جەر سۇرادىڭ با, مىنە كوممۋنيكاتسييا باعاسى وسىنداي بولىپ تۇر, سوندىقتاندا كاسساعا وسىنداي سوما تەڭگەڭدى تولە دە, ۇيىڭدى سال دەپ, ا تو جاسىراتىنى جوق, تانىسپەنەن جەردى الامىز دا, بəلەنباي باعاسىنا ساتامىز, سەبەبى əنشەيىن كەلگەن سوڭ, باعالامايمىز, ال بىرەۋلەردىڭ قولى جەتپەي جۇرگەنىمەن شارۋامىز جوق, قازىرگى زاماندا اعايىن,ادامشىلىقتى ۇمىتىپ, اقشانىڭ قۇلقىنىنا تۇسىپ كەتتىك قوي,

  11. Əلسەركە يبراحيم 26 ماۋسىم, 2016 12:41 جاۋاپ

    جەمقورلىقتىڭ شىڭىنا شىعىپ ارام جولمەن بايىعان ساعىنتاەۆتىڭ , مىرزاحمەتوۆتىڭ جەر داۋى ۇشىن باستارى اۋىرماسى انىق . ولار جەردىڭ ساتىلعانىنا مۇددەلى تەرىس پيعىلدى پەندەلەر . وسى كوميسسييانىڭ قۇرامىنداعى كوپتەگەن ارام پيعىلدىلاردىڭ كەسىرىننەن كوميسسييا وز جۇمىسىن Əدىل ورىنداعان ەمەس . پىكىر جازعىش قازاقتىڭ كەيبىر توپاستارى وسىنداي سەنىمنەن شىققان باسشىلارعا سەنەمىن سەنىمنەن شىعادى دەپ ماقتاعاننان باسقا تۇك جازبايدى . وسى كوميسسييانى قۇرۋدىڭ قاجەتى جوق ەدى , سەبەبى حالىق ويىن اشىق بىلدىردى توقەتەرى زاڭداردى قاتە قابىلداعانىن مويىندادى , سوندىقتان ساتۋ , ۇزاق مەرزىمگە جالعا بەرۋدى توقتاتۋ قاجەت ەدى . قۋىرشاق كوميسسييا ەكەنىن بىلىپ وتىرمىز , بۇل قازاقتى الداۋ قورقىتۋ عوي .

پىكىر نەمەسە جاۋاپ جازۋ