ҚазТАГ ақпарат агенттігінің жетекшісі Әсет Матаевтан антикоррупциялық бюрода жауап алған соң босатылған. Ал әкесі, Қазақстан журналистер одағының басқарма төрағасы әрі Ұлттық баспасөз клубының басшысы Сейітқазы Матаев сонда қалған. Бұл туралы Азаттық хабарлады.Әкелі-балалы Матаевтар антикоррупциялық бюроның Алматы қалалық департаментіне әкелінген. Ведомсвтода Матаевтарға мемлекеттік саясатты насихаттауға бөлінген қаржыны жымқырды деген айып тағылғанын айтты. Сейітқазы Матаев бұған қоса заңсыз кәсіпкерлікпен айналысты және салық төлеуден жалтарды деген айып тағылған.
Әсет Матаев Азаттыққа тергеушілермен әңгімеде адвокат болмағанын айтты. Әсет және Сейітқазы Матаевтар ҚазТАГ пен Ұлттық баспасөз клубы мемлекет қаржысының жымқырылуына қатысы жоғын айтады. Әсет Матаевтың пікірінше, қуғындауға Ұлттық баспасөз клубының "Алматы мен Астананың орталығындағы ғимараттарын және ҚазТАГ-ты алып қойғысы келетін биліктегі бірнеше адамның қатысы бар".
Әсет Матаев пен Сейітқазы Матаев Ұлттық баспасөз клубында өткен "Ұлттық баспасөз клубы мен ҚазТАГ агенттігіне қатысты жағдай туралы" баспасөз конференциясы басталғанға жарты сағат қалғанда антикоррупциялық бюроға жеткізілген. Бүгін Матаевтардың атынан таратылған мәлімдемеде олардың өздеріне қатысты оқиғаларды биліктің үкіметтік емес ұйымдар мен ақпарат құралдарына қысым жасау әрекеті деп бағалайтыны айтылған.
Естеріңізде болса 22 ақпан күні таңертең ағайынды Матаевтардың тұтқындалғаны туралы хабарланған болатын.
Дерек көзі: korrespondent.kz
