АЛАШ ТАҚЫРЫБЫ ТӨЛ ӘДЕБИЕТІМІЗДІ ТОЛЫҚТЫРА ТҮСТІ

629197_103184757_cccc Қазақстан Жазушылар одағының Әдебиетшілер үйінде Қазақстан Жазушылар одағының ұйымдастыруымен Еуразиялық топтың (ERG) қаржылық демеушілігімен Қазақ хандығының 550 жылдығына орай өткізілген «Алаш тарихының ақиқаты» атты жабық бәйге жүлдегерлерін марапаттау рәсімі болып өтті. Салтанатты кеште белгілі сахна шеберлері мен эстрада жұлдыздары өнер көрсетті. Атап өтерлігі, бәйгеге елі­міздегі және шетелдердегі ниет білдірген қаламгерлердің барлы­ғының қатысуына мүмкін­дік берілді. Жоғары деңгейде ұйым­дастырылған шараның ашылу салтанатында ҚР Мәдениет және спорт министрі Арыстанбек Мұхамедиұлы, Алматы қаласы әкімінің орынбасары Арман Қырықбаевтар жүлдегерлерді құттықтап, жылы лебіздерін білдірді. Қазақстан Жазушылар одағының төрағасы, сенатор Нұрлан Оразалин бұл бәйгенің төл әдебиетіміздің дамуына жаңа серпін бергенін атап өтті. Талғамы мен талабы жоғары әділқазылар ұйғарымымен проза саласы бойынша бас жүлде жазушылар Тынымбай Нұрма­ғам­­бетовке, бірінші орын Момбек Әбдәкімұлына, екінші орын Тұрысбек Сәукетаевқа, Бақыт­жан Қанапияновқа, Қуаныш Жиен­байға, үшінші орын Әділбек Ыбырайымұлына, Төкен Әлжан­тегіне, Асқар Алтайға, Серік Сағынтайға берілді. Поэзия жанры бойынша бас жүлдеге ақындар Серік Тұрғынбеков, бірінші орынға Сайлау Байбосын, екінші орынға Серік Ақсұң­қарұлы, Әбубәкір Қайран, Жарас Сәрсек, үшінші орынға Қорғанбек Аманжол, Бақытбек Бәмішұлы, Ғалым Әріп, Ескен Елубай, Мыңбай Рәш, Наурызбек Саршаев ие болды. Драматургия жанры бойынша бас жүлдені белгілі ақын Иранбек Оразбаев жеңіп алды. Бірінші орын Рахымжан Отарбаевқа, екінші орын Сұлтанәлі Балғабаевқа, Думан Рамазанға, Жолтай Әлмештегіне, үшінші орын Нұрғали Оразға, Кенжебай Ахметке, Жәркен Бө­дешке және Мағира Қожах­метоваға бұйырды. Оған қоса жүлдегерлер шығармалары екі томдық кітап болып «Ан Арыс» баспасынан жарық көрді. Сонымен әдебиет атты әлемді дүбірге бөлеген әдеби бәйге мәресіне жетті. Әрине, бүгінгі­дей дағдарыс кезінде осындай шара­лар арқылы билік назарынан қағыс қалып жүрген қалам­герлерге қаржылық қолдау көрсету құптарлық жағдай. Бәйгеге екі жүзге жуық шығарма ұсыныл­ған екен. Дүбірлі додаға кім де болса құнды шығармаларын ұсынатынын ескерсек ең басты жүлдені қазақ әдебиеті иеленгенін аңғару қиын емес. Бір тақырып аясында екі жүз шығармамен толыққан төл әдебиетіміздің қоржыны кәдімгідей салмақтана түсті деп сеніммен айтуға болады. Енді осындай игі дәстүр жалғасын таба берсе екен деген тілекпен тарқасты аталмыш шараға көптеп жиналған қазақ әдебиетінің жанашырлары.

З.АБАЖАН

"Қазақ үні" газеті