АДАМДАРДЫ  АЛДАУ ОҢАЙ, АЛЛАНЫ ҚАЛАЙ АЛДАЙСЫҢ, ЖАСАРАЛ?!.

218450

жасарал

ӨЗ ӨТІРІГІНЕ СЕНІП КЕТКЕНДЕР ӨЗГЕДЕН ДЕ СОНЫ ТАЛАП ЕТЕТІНІ ЖИІРКЕНІШТІ…

 

          Жасарал Қуанышәлиннің кезекті жаласын оқығанда жандалбасалаған жанкешті бетбақтықты көріп, жаным ашып, «осыны қоя салайыншы» деп ойлаған болатынмын. Бірақ, оның қазақ тілін қолдап, орыс тілін Конституциядан алып тастау туралы он мыңдаған адам қол қойған әйгілі «138-дің хатына» қол қоймай, қашқаны әшкере болғаннан кейінгі жауабын көріп жағамды ұстадым. Ол беті бүлк етпей: «…сенімен телефон әңгімесінде-ақ мен саған ол хатты жарияланған соң бір-ақ көргенімді, ол жөнінде маған ешкім ештеңе айтпағанын ұғындырғанмын…» деген қып-қызыл өтірігін оқығанда… таң-тамаша болдым… Міне, саған «саясаткерлік!..» Саясат туралы сөз қозғай қалса, бісмілласын «олар саясатқа таяз» деп, ұлтшылдардың балағынан бір тістеп қалудан бастайтын, тіпті, мені қойшы, ұлтшылдар көсемі, әлемге әйгілі ақын Мұхтар Шахановты мінеуден жалықпайтын оның «саясаткерлігі» – осы, өтірікті сарт еткізіп, сағызын шайнап тұра беретіні екен ғой… Мейлі ғой, шайнай берсін, бірақ, «өтіріктің құйрығы бір-ақ тұтам» деген бабалар нақылына бас ауыртпайтыны, әшкере болатыны ойландырмайтыны шошытады.

«ҚҰЛДЫ БӘРЕКЕЛДІ ӨЛТІРЕДІ» – КӨП КҮШЕНУ ҰЯТҚА ҚАЛДЫРАДЫ…

               Мейлі, «Жас Алашты» алдай салу оңай болсын, Жасарал Қуанышәлинді білмейтіндер де сеніп қалар… Иә, айдарлы сөз айта қалсаң, айдалада жүрсе де, тыжырына қалатындар, туғаннан теріс біткен теріс пиғылдылар, ішкі иір есебін қанағаттандырғысы келетіндер сенуге тырысады бұндай жамау-жасқау жалалы жандалбасаға… Бірақ адамдарды алдағанмен, Алланы алдай алмайсыз ғой, Жәке-ау!..

90 жылдық тарихы бар, кезінде алыптарымыз еңбек еткен, Шерағаң, Сейдағаңдар басқарып, талай тарлан­ның тері сіңген халықтың төл меншігі «Жас Алашты» редакцияда бір күн істемей-ақ жекешелендіріп алған рысбек(және халық мүлкін жекешелендіру туралы өзгелерді кінәлаудан алдына жан салмайды – парадокс), Рысбек Сәрсенбайұлына бәрібір, ел газетін жеке мақсатқа, қарау пиғылға қару етудің «жемісті» үлгісін көрсетіп келе жатыр. Оның, қазіргі «Жас Алаштың» бетінде қараланбағанқайраткер-қаламгерлер аз…
Мен сізге хабарласқанда, Жәке, өкінішіңізге орай, ол «138-дің хаты» әлі ешқайда жарияланған жоқ еді… Алжығандар болмаса, қарапайым бірінші сынып баласы да айтпайтын және сенбейтін сөз айтасыз! Қарапайым ғана сұрақ: «ЕГЕР ЗИЯЛЫЛАР ҚОЛ ҚОЙҒАН ОЛ АШЫҚ ХАТ ЖАРИЯЛАНЫП КЕТКЕН БОЛСА, ОНДА МЕН СІЗГЕ  НЕ ҮШІН ҚОЛ ҚОЮҒА ХАБАРЛАСҚАНМЫН?»

Өйткені ол ашық хат менің қолымда, әлі түгел қол қойылып бітпеген еді… Мұхтар Шаханов ағамыз бастаған ұлт зиялылары «Жалын» журналында барлық саясаткерлер мен қаламгерлерге телефон соғып, түгендеп жатқанбыз. Себебі, мен 29-30 тамызда Өскеменде өтетін «Шығыс шынары» мүшәйрасына кетуім керек болатын да, тезірек қол қоюды бітіріп кету үшін, өзіме тапсырылған тізімдегілерді түгендеп, сізге 25-26 тамыздарда хабарластым. Ал хат барлық басылымдарда, интернет сайттарында қыркүйектің 4-інен бастап, жарияланды. Сонда мен хат жарияланардан кемінде 10 күн бұрын сізге хабарластым. Егер жарияланып кетсе, сіз қазірдің өзінде жоқтан бар жасап отырғанда, ол кезде алдымен алақайлап, соны айтып, «жарияланып кетті ғой» деп, қуана-қуана ақталатыныңыз айдан анық еді… Ал сіздің қол қоймай қашқаныңыздың себебін «алдымен билікті ауыстыру үшін жұмыс істейік, тіл мәселесі кейінгі кезекте істелетін іс» деп жауап бергеніңіз, менің де қоя қоймай, «мұндай ұлт үшін маңызы зор мәселеде барлық қоғамдық ұйымдар мен саясаткерлер түгел, бір сапта болғаны дұрыс еді» деп үгіттегенім, ақыры айқайласып тынғанымызды көз алдыңызға елестете алатын шығарсыз… әлі де… Кез келген саналы адам 3 жастан бастап есіндегіні сақтайды ғой, сіздің 3 жыл бұрынғыны «ұмытып қалуыңыз» мүмкін емес. Мен сеземін, сіз жоғарыдағы өтірігіңізді жазып жатқанда да, осы оқиға, осы сөздер көз алдыңызға елестеген шығар… «Мейлі, «ол хатты жарияланған соң бір-ақ көргенім» туралы сылтау кете берсін, газет бетінде, жұрт осылай ойласын, ел естіп тұрды дейсің бе сол кезде» деп саналы түрде барып отырсыз мұндай Тазша баланы жолда қалдыратын ертегі өтірікке… Қазір осыны оқып отырғанда тура үстіңізден түскеніме және… сол кезде әдейі өтірік соғып жіберген үлкен қателігіңізге, оны біліп қойып, әшкерелеп отырған маған… кезекті жынданудың үстінде екеніңізді де сеземін. Бірақ енді, амал жоқ, Жәке, «айтқан сөз – атылған оқ!». Енді оны қайтара алмайсыз. Оның үстіне газетке жарияланып кетті… Енді сол өзіңіздің кім екеніңізді әшкерелеген өз өтірі­гіңіз­ге өзіңіз сенуді одан сайын кү­шейтіп, бетбақтырмай өршелене беруден басқа жол жоқ сізге? Егер шынында да сезім ағзаларыңызда нұқсан болмаса… ол сөздеріңіз анық есіңізде ғой, мойындаңыз… Қолмен істегенді мойынмен көтере алар ер болсаңыз елден кешірім сұраңыз! Ал денсаулыққа ондай нұқсан келген болса, онда маған емес… тиісті емдеу орындарына хабарласқаныңыз дұрыс шығар…

Өтіріктің ең жаманы, адам өзіне-өзі сеніп кеткен өтірігі! Ал ол қып-қызыл өтірікке сенуді өзгелерден де талап ету, тіпті жиіркенішті!.. Мен осындай адам өлтіретін өтірікті бұдан бұрын да естіп қалып жүретінмін. «Жасарал ол «138-дің хаты» жарияланып кеткесін бір-ақ көрдім» депті ғой» дегенде сенбей, «Мүмкін емес, олай айтуы! Өйткені, мен өзім сөйлестім ғой ол кісімен қол қою туралы» деген едім бір-екі жерде. Ал енді мына, сіз өз аузыңызбен, өз қолыңызбен газет бетінде осылай бүлк етпей былш еткізіп, қып-қызыл өтірікті қызармай жазып отырғанда… бір-ақ түкірдім сіздің жанкешті өтірікшілігіңізге ешқандай қатысы жоқ… жазықсыз қара жерге!..
Одан соң, «телеарналарға қазақ тіліне қарсы, орыс тілін қолдап, сұңқылдап сұхбат берді» деп мен сізді айтқан mamai2жоқпын, Жанболат Мамайды айттым ғой. Және ол бірнеше рет жарияланды да…   «Қазақстанның әр  азаматы өз пікірін айта алуы керек» деген қағиданы қайталаудан жалықпайтын Жасекең ол қағиданы таңдап қана таңады екен. Мысалы, Мамай-Жүнісовтердің қазақ тіліне қарсы пікір жариялауы осы қағидаға сай келеді екен де, «Не оттап отырсыңдар, бұл дұрыс емес, бұл – арандату!» деген біздің қарсы пікіріміз ол қағидаға сай келмейді екен! Неге? Ол оларға, қазақ тілін қолдаудан қашып, орыс тілін қолдап, орыс телеарнасына сұхбат берген Жанболат-Жасаралдарға жақпайды! Неге? Өйткені оларды «асырап» келе жатқан қожайыны Әбіләзов қазақ тіліне қарсылығын ашық мәлімдеген болатын…» дегенде алдымен, Жанболаттың аты айтылып тұр және бұл өткендегі Жанболатқа жазылған жауапта анық, жеке жазылған соң, оқырманға түсінікті екені анық. Мен сіз туралы «Кейін Әбіләзов қазақ тілін қолдаған «138-дің хатына» қарсы шыққан соң, қожайыннан Мамайға дейін, жап-жақсы тіл туралы мақалалар жазып жүрген сізге дейін, қазақ тілін қолдауға қарсы шыққан соң, біз байланысты күрт үзіп, сынауға көштік…» деп отырып, сіздің тіл туралы тәуір мақалалар жазғаныңызды айта отырып, «телеарнаға орыс тілін қолдап сұхбат берді» деп айтпайтыным түсінікті емес пе? Мен сіздің бұл жерде «138-дің хатына» қол қоймай, басыңызды алып қашқаныңызды айтып отырмын ғой. «Бас-басыңа бай қайдан?» дегендей, Жанболатқа бөлек, Жасаралға бөлек сөз арнау артық шығар бұл жерде. Қазақ тілінің заңдылықтарын білетін кез келген адам түсінеді мұны… Жоқ, сіз бен Мамайдың кіндігі бірге жаралған бір адамсыздар ма? Онда «Жанболат – Жасаралдар» деп дұрыс айтып отыр екенмін ғой… Жоқ, шынында да, көру, оқу, сезім органдарыңызда бірнәрсе бар ма? Мен өткенде-ақ айттым ғой, «қызыл көзденіп, бәле іздемесеңіз, барлығын анық көруге болады»деп…
Ал қазақ тілін қолдауға қол қоюдан қашатын Жасарал енді Мамай-Жүнісовтердің «орыс тіліне мемлекеттік статус беру керек» дегенін ол «орыс тілін қолдауға арналған тұтас мақала емес, арасында кеткен бір ұсыныс қана, оған бола Мамай-Жүнісовтерді кінәлаудың керегі жоқ» деген мағынадағы ақталуды да қандай оймен айтып отырғанына таңым бар? Онда мен Серік Сапарғали туралы тұтас мақала жазайын да, арасына «Серіктің тырнағына да тұрмайтын Жасарал Қуанышәлин деген біреуді сөз етудің де қажеті жоқ» деген бір сөйлем қосып жіберсем болады екен ғой? Онда сіз мені кінәлай алмайсыз! Себебі сіздің ергежейлі «ережеңіз» бойынша мен Жасарал туралы тұтас мақала жазып отырған жоқпын, арасындағы бір сөйлем ғана ғой… Осындай «демократиялық» дүмбілез оймен бүлдіріп отырып, өзгелерге саясаткерлік, саясат туралы дәріс оқығысы келетінін қайтерсің бұлардың…
Мысалы, «Ашық алаң» газеті орыс тілі туралы оттағанда сіз, алдымен, ақсақал болып, «тәйт» десеңіз болмас па еді… Онда біз сізді қолдап шыға келетініміз анық еді… Олай аталы сөз айтудың орнына «демократия» деп, «әркім өз пікірін айтуға құқылы» деп соққан жас Мамайдың алдына түсіп алып шапқылап кеттіңіз… Жанболат қабағын қаққаннан қалбалақтап, қалам-қағазға ұмтылған сіз бас-көзге қарамай, әлі шауып келесіз… «Құлды бәрекелді өлтіреді» дегендей ышқынып, күшенуіңіз басылар емес… Көп күшену де… ұятқа қалдыратынын ұмытпаңыз… «Сақалды құл жарытпас» болып, сасып отыру… «саясаткерге» сай емес…

ДЕНІ ДҰРЫС ДЕМОКРАТ ЕШ УАҚЫТТА ӨЗІНІҢ ҰЛТТЫҚ МҮДДЕСІНЕ ҚАРСЫ ШЫҚПАЙДЫ…

            «Ашық алаң» газетінде орыс тіліне мемлекеттік статус беру керек» деген Жириновскийлерге майдай жағып, аттанына арқау болатын сандырақты неге жариялап жүрсіңдер?» деген «Қазақ үні» газетінің сауалына Жанболат Мамай дәл сіз сияқты «Әркім өз пікі­рін айтуға құқылы» деп жауап бер­генде шындықты шырқыратып жыр­лап жүрген ұлттың тегеурінді ақыны Темірхан Медетбектің: «Онда «Ашық алаң» – әркім сарып кететін сасық алаң екен ғой» деп бір-ақ кескенін бүкіл ел оқыды… Тағы да айтамын, мені «демократ емес, диктатор» деп кінәлапсыз ғой ақыры, ондай ұлтқа қарсы демократияның нақ атасының аузын!.. Ұлтсыз демократиядан ұлттық диктатура артық мен үшін!

Сіз ойландыңыз ба, неге осы Ресей­дегісі болсын, өзіміздің қазынаны ортайтып отырған орыстілді БАҚ болсын, «Жасарал-Жанболаттар айтқан демократия деген бар еді ғой» деп, ең болмаса, бір рет сол біз көтерген ұлттық мәселені қолдап, «Конституция­дан орыс тілін алып тастау керек» деген ұсынысты жазбайды? «Орыс тіліне мемлекеттік мәртебе беру керек» деп, Мамай-Жүнісовтер насихаттаған, Қуанышәлиндер құптаған ұсынысты қуана-қуана бағдарламасына қосқан, сол сіз айтқан демократияның есебінен Ресей думасының вице-спикері болып отырған Жириновскийлер, ең болмаса, бір рет, демократия үшін: «Ресейдің барлық автономиялы республикалары мен облыстарының тілі Ресей Федерациясының мемлекеттік тілі болсын!»-деп, сендер сияқты неге бір ауыз айтпайды? Жоқ, сендер жеткен «ақылға» олар жетпеген бе әлі?.. Орыс халқының өкілдері: «Ей, қазақстандық орыстар мен өзге ұлт­тар, ширек ғасырдан бері жер­гілікті негізгі ұлттың тілін, мемлекетіміздің мемлекеттік тілін үйренетін кезіміз болды ғой. Үйрене алмайтындай миларымыз жоқ па, әлде ниеттеріміз жоқ па?» деп неге бірауыз айтпайды?!. «Мемлекетте мемлекеттік тілді міндеттейтін рух, жігер жоқ, Тәуелсіздіктің ширек ғасырынан бері, ең болмаса, Павлодары мен Петропавлдың ежелгі атын қайтара алмаған биліктен не қайыр? Өздеріміз үйреніп алайық қазақ тілін» деп, қазақстандық бір орыс саясаткері, ең болмаса, зиялысы, тіпті, Қазақстан Халқы ассамблеясы айтпай ма, демократияны ақтау үшін… Не, демократия, ұлтаралық татулық, патриоттық бізге, қазақтарға ғана керек те, оларға керек емес пе?!.
Орыстілді басылымдар да, орыстіл­ді саясаткерлер де демократияны өз мүдделері үшін ғана пайдаланады, бірақ олай ешуақытта айтпайды… Себебі біреу! Дені дұрыс демократтар еш уақытта өзінің ұлттық мүддесіне қарсы болмайды. Олар демократияны біздің бейнегіз бейшара ақымақтар сияқты түсінбейді, ұлттық мүдде тұрғысынан ұғады! Себебі олар құл емес… қожайын. Міне, айырмашылық осы жерде. Болды! Басқа демагогиялық-демократиялық бос былшылдың қажеті жоқ!
Енді Жасаралдың «Қарағым-ау, билік тарапынан қауіп күтетіндей ештеңе жоқ, оның есесіне оны қол­дау­шыларға тәжірибе көрсеткендей арзан саяси ұпай жинап беретін хатқа ҚОЛ ҚОЮ қашаннан «ерлік» болып саналады?» деп бұлтаң етіп, қара мысықша аунап түсуін қалай түсінуге болады… Мұнымен ол не айтпақшы? Бұл жерде Жәкеңнің шын ұсқыны ашылып тұр… Билік қауіп күтпесе, тайлы-таяғымен жабылып, Ертісбаевтарды былай қойғанда, Сенат, Мәжіліс төрағалары, Үкімет басшылары мен министрлер бар жұмысын жиып қойып, осы 138-дің хатына қарсы шығатын жиын өткізеді ме? Сенат төрағасы Қайрат Мәми орыстілді журналистерді жинап алып, «Конституциядан орыс тілі туралы бап ешуақытта алынбайды» деп ант бере ме? Қауіп болмаса, орыстілді барлық басылым, интернеттер 138-дің хатына өре түрегеліп, қарсы шығып, Мұхтар Шаханов бастаған осы хатты ұйымдастырушыларды қаптаған сынның астына ала ма? Жоқ тағы да сілтемесімен қосып тізіп берейін бе, ол сынаған мақалаларды? «ҚОЛ ҚОЮ ерлік болмаса, зорға қиналып қол қойған оппозиция басшылары артынан жапатармағай қойған қолдарынан бас тарта ма? Өзіңіз неге тырағайлап қашып алып, енді бетіңіз бүлк етпей, бүкіл елге өтірікші атанып, «ол хатты жарияланып кеткен соң көрдім» деп соғып отырсыз… Жоқ, олай емес, сіздің алғашқы бір белгілі сайтқа жіберген жауабыңызда (Онда тіпті көше әйелдеріндей аузыңызға келгенін оттағансыз, сондықтан ол хат жариялана салысымен түсіп қалды сайттан. Ал мына жерде газет ұялған болуы керек, біршама түзеп, күзегені көрініп тұр) шыныңызды айтқансыз, «Мұхтар Шахановқа ерегісіп, оның үстіне маған хатты кештеу әкелгені үшін қол қоймадым» деген мағынада жауабыңыз бар. Ол жауабыңызда «жарияланып кеткен соң, көрдім» деген сөз жоқ болатын… Енді міне, газетке шығып, елге тарайтын болған соң, «жарияланып кеткен соң көрдім, содан соң қол қоймадым» деп өтірікті соғы-е-еп отырсыз… Келесі бір мақалаңызда қол қоймағаныңызға тағы бір себеп табатын шығарсыз… Бұдан шығатын бір-ақ түйін – Жасарал Қуанышәлин үшін өзі бастамашы болмаған, өзі қол қоймаған ұсыныс ұлт үшін қандай маңызды болса да, мәні жоқ… Оған өзінен артық ешкім жоқ. Өзімпаздығына құл болған одыраң оттаубайлар иесі үшін одан басқаның бәрі саясаттың не екенін білмейді деген топас тұжырым.

 БИЛІК пен ЖАСАРАЛДАРДЫҢ ҰЛТШЫЛДАРҒА АРТАТЫН КІНӘСІНІҢ БІРДЕЙ БОЛУЫ – ЕКЕУІ ДЕ ОРЫСҚҰЛДАР!

              Одан кейін «саяси ұпай жинау үшін» деп тура биліктің бізге артқан кінәсін аузынан түсірмей қай­та­лап отырғаныңыздан-ақ, түпкі пиғылыңыз анық көрініп тұр. Мен сол митингіде айтқан, кейін  мәтелге айналып кеткен «біздің орысқұл биліктен айнымайтын орысқұл оппозициямыз бар» дегенде Әбіләзовты тура Ертісбаевтың сөзін қайталағаны үшін сынаған болатынмын. Енді, міне, Ертісбаевтардың бізге жапқан жаласын, билікпен ауыз жаласқандай сіз де айтып отырсыз… Бұдан кейін сізге не деуге болады?
Саяси ұпай жинау деген сіз үшін мақсат-мұрат шығар, біз үшін ұлттың мүддесі қымбат. Сол «138-дің хатын» ұйымдастырушылар жетекшісі, ұлтшылдар көсемі, біртуар ақын, қайсар қайраткеріміз Мұхтар Шахановқа қандай саяси ұпай керек? Халық алдына шыққанда Мұхаңмен абырой, сіздерше айтсақ, «саяси ұпай» таластыра алатын кімің бар? Әнебір жылы белгілі саясаттанушы Дос Көшім ұйымдастырған Құрылтайда Мұхаң сөйлегенде бүкіл елден келген барлық делегация жастары мен ақсақалдарына шейін тік тұрып қол шапалақтап, ұзақ құрмет көрсетіп еді ғой… Сонда Шаханов туралы жалған жалалы кітаптар таратып жүрген Х.Қожахмет пен сіз екеуіңіз ғана қатар отырған орындарыңыздан тұра алмай… бүлдіріп қойған мешел баладай мелшиіп, қап-қара болып, түтігіп кетіп едіңіздер ғой… Тағы да «саяси ұпай жинау үшін» деп қояды-ау… күйдіріп… Бұл пасық пиғылыңыз туралы белгілі қайраткер, «Азат» қозғалысының бұрынғы төрағасы Төлеубек Сейітқалиұлы сізді сойып салған мақаласында тура келтірген: «Қазақ ұлтының беткеұстар мұхтар шазаматтарын қаралауда Жасарал алдына жан салмайды. 2009 жылы 24 бет болып басылған «Мұхтар Шақаловтың (Шахановтың) шайтандықтары» атты Хасен Қожахмет, Жасарал Қуанышәлі және басқа адамдардың М.Шахановқа қарсы пікір айтқан көптиражды кітапшаны кеңсе, оқу орындарында, тұрғын үйлерде, қоғамдық орындарда таратты. Бұл жерде Мұхтар Шахановты Жасарал «биліктің адамы» дейді. М.Шахановтың саяси деңгейі төмен, бірақ өзін мықты қайраткер етіп көрсетуге өте құмар. М.Шахановтың бейнесін кейбіреулер Құдаймен теңестіреді деген 24 беттік кітапшада М.Шахановтың ерлігі айтылмай, тек қана кемшіліктері көрсетілгені. Ал, Шахановтың ерлігі мен азаматтығын бүкіл ел біледі». «СЕНГЕН ҚОЙЫМ СЕН БОЛСАҢ…» Жасарал өз халқының тамырына балта шабуға кіріскенін айтуды міндетім деп санаймын» (http://www.qazaquni.kz/?p=26605).
Сіз бірді бірге соғып отырып, «2011 жылы жарияланған «138-дің хатынан» бұрын мен орыс тілін Конституциядан алып тастау туралы 2010 жылы 20-қыркүйекте айтқанмын» дейсіз. Өте жақсы, зор рахмет, жасай беріңіз, Жасеке! Бірақ бұл жерде «оны кім бұрын айтты» деген мәселе тұрған жоқ, бүкіл ел қолдап, «Қазақ үні» газетіне 15 мыңнан астам қолдау хат жиналған Үндеуге кім қарсы болып, қол қоюдан қашты деген мәселе тұр ғой. Мысалы, Серік Сапарғали да сізден бір жыл бұрын, 2009 жылы Қазақ халқына жазған Үндеуде Конституциядан орыс тілін алып тастау, бір ғана мемлекеттік тіл туралы айтқан. Ол Үндеу 2009 жылы 17-желтоқсанда Республика алаңында оқылып, «Правда Казахстана», «Ақ Тарлан» газеттерінде, «Елрайы.кз» және Зона.кз сайттарында жарияланды. Ал біздің «Жас қазақ үні» газетінде орыс тілін Атазаңнан алып тастау туралы менің тіл туралы мақалаларымда 2005 жылдан бері талай жазылып келеді. Қорытындысы – 2011 жылғы әйгілі «138-дің хаты» болды. Оны біз «бәрінен бұрын жаздық» деп еш жерде айтып жатқан жоқпыз ғой… Ол түгілі, 2004 жылы мемлекеттік тілге қарсы дауыс берген Парламенттің жабуын жұлып алып, орыс-қазақтілді басылымдардың ешқайсысы жұмған аузын аша алмай отырғанда стенограмманың өзін жариялап жіберіп, елге масқара қылған, «Мемлекеттік тілге қарсы Парламент таратылсын!» деген қоғамда шын мәніндегі бомба болған мақаламызды сөз ретіне орай анда-санда айтып қалсақ, кейбір өздерін ғана оппозиция санап үйреніп қалған, шын мәнінде жеке есепке құрылған жалған шерхан моппозициялық басылымдардың шекесі тырысып шыға келеді… Ал әйгілі Шерхан Мұртазаның өзі «Егемен Қазақстан» газетінде: «Кімнің кім екенін білгің келсе, кімнің қазақ тіліне жақ, кімнің қарсы екенін білгің келсе, «Жас қазақ үнін» оқыңдар!» десе, «Қазақ әдебиеті» газеті: «Жас ақазақ үні» газеті ұйықтаған елді бір мақаласымен-ақ түртіп оятты» деп жазды. Менің сол елді оятқан бір мақалама бола Парламент өз тарихында өзгеріс жасап, қаулы шығарып, «бұдан былай стенограмма сыртқа жіберілмесін» деген шешім шығарғанын сол кездегі депутат, белгілі қоғам қайраткері Амангелді Айталы жақсылап жазған болатын…
Ал «Жас қазақ» газетінде жарияланып, «Қазақ үні» көшіріп басқан «ҰЛТТЫҚ МҮДДЕНІ ӘБІЛӘЗОВТЫҢ МАЙШЕЛПЕГІНЕ АЙЫРБАСТАП ЖІБЕРДІҢ, ЖАСАРАЛ!» деген атпен Серік Сапарғали екеуіңіздің таспаға басылған ашық айтыстарыңызды келтірген жерді өзіңіз түгел келтіріп шығыпсыз, рахмет, мен тек маған артқан кінәңізге жауап үшін бір жерін келтіре кетейін:
«Енді, сіздің «ұмытып қалаты­ныңыз­ды» ескере отырып, рұхсат етсеңіз, Серік Сапарғали мырзаның көзіңізге қарап, бетіңізді тіліп тұрып, әшкерелеп айтқан бір-екі сөзін ғана есіңізге сала кетейін: «ҰЛТТЫҚ МҮДДЕНІ ӘБІЛӘЗОВТЫҢ МАЙШЕЛПЕГІНЕ АЙЫРБАСТАП ЖІБЕРДІҢ, ЖАСАРАЛ! ҚАЗАҚТАР ҚИНАЛЫП ЖАТҚАНДА АЯҚ БАСҚАН ЖОҚСЫҢ! КОЗЛОВТЫ ҰСТАҒАНДА ШАҢДАРЫҢ ШЫҒЫП КЕТТІ! СЕНДЕР МҰНАЙШЫЛАРДЫҢ МӘСЕЛЕСІН ӘЛІ КҮНГЕ ДЕЙІН ТҮСІНБЕЙ ЖҮРСІҢДЕР! ЕГЕР МАҒАН ШАБУЫЛДАЙТЫН БОЛСАҢДАР, 61 ТОМНЫҢ БӘРІН ИНТЕРНЕТКЕ ШЫҒАРАМЫН. ҚАЗІР ӘБІЛӘЗОВТЫҢ АҚШАСЫ БОЛҒАН СОҢ, ШАШБАУЫН КӨТЕРІП ЖҮР. АҚШАСЫ БІТКЕН КҮНІ ОЛИГАРХ БҰЛАРДЫҢ БІРЕУІН ДЕ ТАБА АЛМАЙ ҚАЛАДЫ. КОНСТИТУЦИЯДАН ОРЫС ТІЛІНІҢ МӘРТЕБЕСІН АЛЫП ТАСТАУ ТУРАЛЫ «138-дің ХАТЫНА» ҚОЛ ҚОЙҒАН АДАМНЫҢ БІРІ – МЕНМІН. ҚОЛ ҚОЙҒАНДАРДЫҢ КӨБІ БАС ТАРТҚАН КЕЗДЕ ӨЗ ПІКІРІМДЕ ҚАЛДЫМ. СОНДЫҚТАН БҰЛАР («алғалықтар» – ред.) МЕНІ ЖАҚТЫРМАЙТЫН БОЛАР…» 
Сонда сіз бірауыз жауап қай­тара алмай, мелшиіп отырып қалдыңыз ғой! Яғни, Серік Сапарғалидың: «Ұлт­тық мүддені сатып жібердің, Жасарал!» дегенін үнсіз мойында­дыңыз! Сонда кім болды ұлттың сат­қыны? Бұған енді елдің жауабы дайын екенімен келіспеуге амалыңыз жоқ екенін де жақсы білемін, Жасеке!»
Сіз бұл туралы былай дейсіз: «Жас қазақ» газетінде жарық көрген… «Олигарх және ақиқат» атты сұхбатта… «жасқазақтықтар» менің Сапарғалидың былжырақтарын жоққа шығарған сөздерімнің көбісін кесіп тастаған» деп ақталасыз. («Жас Алашта» сұхбат аты «Олиграх және ақиқат» деп қате жазылған. Ол бадырайып тұрған өрескел қатені көзі қызарып, тұманданған автор Жасекең де, жариялаған «Жас Алаш» газеті де, мынадай Қазыбек Исаны «айыптаудан» бақыттан басы айналып кеткен бас редактор да түзеуге шамасы жетпеген…). Ал мен ол белгілі журналист, Рысбек Сәрсенбайұлына дейін «Жас Алашты» жарқыратып жүрген журналистердің бірі Шадияр Өстемірұлының жазып алған ол таспасын кейін тыңдағанмын, онда сіз Серік мырзаның семсердей қақ маңдайдан шапқан қарсы сауалдарына түк жауап бере алмай, әшкереленген шындыққа шыдамай, сол жерде редакцияда айқай-шу шығарып, базардағы қатындардың байбаламындай аузыңызға келген боқтық-былапыт сөздер боратқансыз. Ол жерде ешқандай «Сапарғалидың былжырақтарын жоққа шығарған сөздерімнің көбісін кесіп тастаған» – дейтіндей қарсы дәлелді пікір айта алмағансыз. Кейін редакция басшылығы мен журналистері сіздің жанжалыңызға полиция мен «жеделжәрдемді» қатар шақыруға дейін барғандарын айтқанына қара­ғанда жағдайыңыз адам аярлықтай болса керек-дүр… Бір тілші тіпті «аузынан ақ көбік ағып, жынданып кетті ме деп қорықтық» деген еді…
Иә, дұрыс айтасыз, кесіп тастаған сөздер бар, бірақ ол сөздер Секеңе қарсы дәлел емес… Сіздің Әбіләзовке шаң жуытпай, күнәдан пәк періштедей ай мен күнге теңеп, «Сталинге сөз таппай, қиналған Жамбыл жер осы» дегендей боскөбік былжырақтарыңыз… Ең сенімді құлдар ғана осылай «адал» берілген болса керек қожайынына… деп ойлайсыз ол орасан оданы тыңдағанда…

Ал «Қазақ елі» қозғалысының жетекшісі, ұлт-патриоты, белгілі журналист Қажымұқан Ғабдолланың сізді әшкере қылған: «Жасарал Қуанышәлин қазақты қалай сатты?»-деген мақаласын http://www.qazaquni.kz/?p=14089   «Қазақ елі» газеті мен Shyn.kz сайтынан ел жақсы біледі.
Одан кейін сіздің әр сөзіңізде «оппо­зицияға қарсы» деп маған жала жабудан танбапсыз. Мен жалпы оппо­зи­­цияға, ұлттық оппозицияға неге қарсы боламын, оның ішінде өзім де болсам… Жоқ «оппозициямын» деп жалғыз Жасарал ғана айтуы керек пе? Жоқ, халықтың «Жас Алашын» жекешелендіріп алған сияқты «оппозиция» дегенді де жекешелендіріп алғансыңдар ма? Мен қарсы болсам, биліктің де, оппозицияның да орысқұлдарына, ұлттық мүддеге қарсыларына қарсымын! Мұны дәлел­деудің қажеті жоқ, сауаты бар, өзінің газетінен басқа да басылымдарды оқитын бас редакторлар мен көзіқарақты жалпы ел біледі…
«Ақ жол» партиясын «жалған алашшыл» деген жалақорлардың жаласын «Ақ жол» партиясы нақты істерімен жоққа шығарып отырғаны елге белгілі. Тек соңғы жарты жылда жасалған нақты істердің екі-үшеуін ғана айтсақ (бәрін айтсақ, жақсылықты көре алмайтын әдеттеріңмен инфаркт болып қаларсыңдар), жыл сайын өтетін дәстүрлі «ХХI ғасырдағы Алаштың Ақ жолы» атты республикалық байқауды қорытындылап, Алаш көсемі Әлихан Бөкейханға арнап республикалық ғылыми-конференция өткізіп, ас берді. Кеше ғана «Ақ жол» партиясының арнайы Алаш экспедициясы Омбыға аттанып, алғашқы ел руханияты мен саясатындағы зор сүйінші жаңалығы – бұрын еш жерде жарияланбаған Әлихан Бөкейханның тарихи фотосуреті мен Алашорда мен ел тарихына қатысты тың деректер тауып отыр. Ол «Қазақ үні» газетінен бастап, барлық қазақ-орыстілді газеттер мен сайттарда жарияланды. Тек мұндай «Ақ жолдың» Алашқа, ұлтқа байланысты ұтымды іс-шараларын газет атауында «Алаш» деген ат тұрса да, «Жас Алаш» баспайды. Басса да, «нұротандық» басылымдар сияқты «Ақ жол» партиясы» деген жерін кесіп тастап, қуықтай ғып береді… Әлде «Ақ жолдың» не істегенінің бәрін тағы тізіп берейін бе сендерге соқырға таяқ ұстатқандай… Олардың бәрін оқырман «ЖАПҚАН ЖАЛАЛАРЫҢНЫҢ ЖАНАЗАСЫ ШЫҚТЫ, ЖАСАРАЛ – ЖАНБОЛАТ!» http://www.qazaquni.kz/?p=25608  атты өткен жауабымнан біледі.
Осыдан кейін сіздің ішіңіздің ібілістік иірін мына жаладан да көруге болады. «Қазыбек, өзіңнің «Қош бол, оппозиция» деген кезекті антиоппо­зи­циялық мақалаңда «Ал діні қатты деген Жасарал Қуанышәлин бір зейнеткер шалды сотта жеңіп еді, жұмсарып шыға келді де, Президент сайлауынан бас тартты» деп, мысқылдап, мені түйреп өттің. Соған орай, екеуміз Zona.kz сайтында пікір таластырып, сонда сенің ол сөзің жала сөз екенін мен дәлелдеп, сен мойындаған болатынсың» деп, тағы да жала жабасыз. Біріншіден, бұл менің «Қош бол, оппозиция» атты мақалам оппозицияға қарсы мақала ма, жоқ оппозицияның Президент сайлауы­на қатыса алмайтынына күйініп, оларды қайрау, қамшылау ма? Сіздің осыған миыңыз шын жетпеді ме, әлде, әдеттегідей арам пиғылыңызбен әдейі түсінбей отырсыз ба? Екіншіден, мен қай «сөзім жала екенін «мойындаппын…» Сонда сізді «Президент сайлауынан бас тартты» дегенім жала болып шығып, сіз сайлауға қатысқан, бас тартпаған болып шықтыңыз ба? Мұны қалай түсінуге болады? Сіз сайлауға түсіңізде қатыспасаңыз, басқа қай жерде қатысқаныңызды мен ғана емес… ешкім білмейді ғой… Жоқ шалды сотта жеңгеніңіз өтірік пе, әлде жеңіліп қалып па едіңіз? Осы сіз аурусыз ғой деймін шынында да? «Ал діні қатты деген Жасарал Қуанышәлин бір зейнеткер шалды сотта жеңіп еді, жұмсарып шыға келді де, Президент сайлауынан бас тартты» деген сөз сізге қалай жала болады? Мұны оқыған ел менде өзгелерден гөрі сізді сайлаудан бас тартпайтын шығар деген үміт болғанын бірден аңғарады ғой бұл жерде… Мұның бәрін қазақтың сөзінің иірімі мен астарын білетін оқырман сол сайттан оқып, өздері топшылар. Әлгі «жанболат-жасаралдар» – деген сөзді де түсінбей, орыс тілін қолдап, сұхбат берді» дегенді жеке өзіңізге қабылдап, кімнің сұхбат бергені елге мәлім болса да, шаң шығарып, тоңқығаныңызға қарағанда, шынында қазақтың сөздерінің табиғи астарларын түсіне бермейсіз ғой деймін… Иә, өзіңіз айтқандай, баяғыда мен оқыған Абай атындағы КазПИ-де «Педагог» газетінің жауапты хатшысы болып отырғаныңызда өлең апарып жүретін Көркемсурет-графика факультетінің бірінші курс студенті менен қазақтың кейбір сөздерін («абат» т.б.) ежіктеп сұрап отыратын едіңіз, сол маңайдан әлі ұзамағансыз ғой деймін… Бұдан кейін еш ұялмай, сөз білетін адамдардан сұрап алып барып, жазыңыз… не жазсаңыз да…
Содан соң «осы «138-дің хатын» неге айта бересің, одан басқа айта­рың жоқ па» деп ышқынады Жәкең… Әрине, ышқынатындай жөні бар… Бұл хат айтылған сайын, оның қол қоймай қашқаны көз алдына келе қалады да, өкпесі тарыла түседі… Тағы да, «Мен не істесем де міндетсімеймін» дейді де, бүкіл жүрген-тұрғанын тізіп шығады. Мен айтсам, сіздің «Ашық алаңдағы» жалаңызға жауап ретінде айттым. «Еуразиялық одаққа қарсы мақала жоқ» дедіңіз. Мамай, Рысбектердің мақаласынан бастап, бәрін тізіп беріп, жалаңызды әшкереледім. «Елбасыны мақтай береді» дейсіз, ондай мақаланың жоқ екенін, қайта керісінше сынымыздың аз емес екенін көрсетіп бердім. 2004 жылғы сайлаудан бергі «Жас қазақ үні» газетін парақтаған адам сіз аузын толтырып айтқан сынның көкесін оқи алады. Сенбесеңіз, Ұлттық кітапханадан барып оқыңыз, тігінділері бар… Енді оның бәрін не үшін айтып отыр» дейсіз тағы. Мен сіздің жалаңызға жауап беріп отырмын ғой… Енді соны да түсіндіру керек пе сізге?.. Ал сіз жүрген-тұрғаныңызды не үшін айтып отырғаныңызды түсінбедім… Есіңіз кете есіп жазып, тізіп отырған «ерліктеріңізді» оқып, «саясат» пен «демократия» туралы «ақылдарыңызды» тыңдап отырғанда, әйгілі мысалдағы әншілік туралы «дәріс» оқитын Крыловтың атақты ақыруы күшті жануар «кейіпкері» келеді екен көз алдыңа…
Өткенде де, жазып едім, орыстың можантопайларының әйгілі әдісі «сам дурак» деген саяз қайтарма жауаптың айналасынан әлі шықпапсыз… Тіпті, тақырыбына дейін, өз сөзімді өзіме қайталап, жаттағанын ұмытып қалмайын деп, санамақ санағандай сарнағаныңыз көрініп тұр…
Бірақ, сізге бір разы болып отырғаным, менің жіберген жырларымды басуға көлемін қимайтын «Жас Алаш» сізге алақайлап, аямай берген тұтас бір бетінде менің сізге таққан айыбым мен жалаңызға жауабымды түгелге жуық сөзбе-сөз келтіріп, тізіп шыққаныңыз үшін рахмет айтамын… Ол жауап пен айыптауларды оқыған оқырман өзі топшылай жатар кімнің кім екенін…
Сөзімнің соңында айтарым, жалғыз сізге ғана емес, мамай-жүнісов, ертісбаевтарға ғана емес, ұлттық мүддеге қырын қарайтындардың, ұлттың тілі мен мүддесіне қарсы шығатындардың бәріне айтарым, Қазыбек туралы не деп оттасаңыздар да, ауыз өздеріңдікі, Қазақ туралы саңылауларыңа не келгенін сандырақтауға болмайды! «Ас болса – маған, тас болса – саған» деген таспиғыл тасыраң, талтаңдаған танту жүрмейді бұл жерде! Елдің, Тілдің киесі ұрады!
Аман болыңыз, Жәке! Денсаулы­ғыңызға қараңыз…

Қазыбек ИСА

“Қазақ үні” газеті

Серік Сапарғали: “ҰЛТТЫҚ МҮДДЕНІ Әбіләзовтің МАЙШЕЛПЕГІНЕ АЙЫРБАСТАП ЖІБЕРДІҢ, ЖАСАРАЛ!” http://www.qazaquni.kz/?p=13685

Қажымұқан Ғабдолла. Ж.ҚУАНЫШӘЛИН ҚАЗАҚТЫ ҚАЛАЙ САТТЫ?   http://www.qazaquni.kz/?p=14089

ЖАПҚАН ЖАЛАЛАРЫҢНЫҢ ЖАНАЗАСЫ ШЫҚТЫ, ЖАСАРАЛ-ЖАНБОЛАТ!                  http://www.qazaquni.kz/?p=25608

ЖАСАРАЛ, Жанболат, ВАШИ ОБВИНЕНИЯ РАЗВЕЯЛИСЬ КАК ПРАХ!         http://www.qazaquni.kz/?p=26288

Төлеубек Сейітқалиұлы. «СЕНГЕН ҚОЙЫМ СЕН БОЛСАҢ…»  Жасарал өз халқының тамырына балта шабуға кіріскенін айтуды міндетім деп санаймын.    http://www.qazaquni.kz/?p=26605