تۇلعا

1441
0
بولىسۋ:

1

سابىر قاسىموۆ قازاقستان رەسپۋبليكاسىنا ەڭبەگى سىڭگەن قايراتكەر. قالاي ەڭبەگى سىڭگەن دەر بولساق, قازاقستاننىڭ قازاقستان بولۋىنا, ياعني تاۋەلسىزدىگى مەن بوستاندىعى ۇشىن كۇرەسكەن ازامات. قازىر تاۋەلسىزدىكتى بىرنەشە ەسىممەن عانا بايلانىستىرىپ جۇرسەك, سابىر قاسىموۆ سول تىزىمنىڭ الدىڭعى قاتارىندا تۇرۋى تيىس. ناعىز ازامات ەلىنە ەتكەن ەڭبەگىن بۇلدامايدى, وزىن جارنامالامايدى. سول ۇشىن س.قاسىموۆ تاسادا قالىپ قويدى. بىراق تاسادا جۇرسە دە اتقارعان قىزمەتىنىڭ وراسان بولعاندىعى ۇشىن ەل الدىندا كەۋدەسىن سوعىپ جۇرگەندەردىڭ كوپشىلىگى ساكەڭنىڭ قاسىندا مىسى باسىلىپ قالادى. ساياسي قۋعىن-سۇرگىن قۇرباندارىن اقتاۋعا, جەلتوقسان كوتەرىلىسىن اقتاۋعا ەرەكشە اتسالىستى. وزى زاڭگەر بولعان سوڭ جوعارىدا اتالعان ىستەردىڭ بارلىق تەتىكتەرى مەن تاعدىرى س.قاسىموۆتىڭ قولىندا بولدى. 1990 جىلدان باستاپ ورالماندار ماسەلەسىن جان-جاقتى زەرتتەپ, باعدارلاما قابىلداۋدى, ونى ىسكە اسىراتىن تەتىكتەردى ازىرلەپ, العاشقى كونستيتۋتسيياعا, زاڭدارعا ورالماندار مۇددەسىن قولدايتىن ساياسي-قۇقىقتىق نورمالار ەنگىزدىرگەن ازامات. ولارعا «ساياسي قۋعىندالعان» دەگەن مارتەبە بەرۋدى دە العاش بولىپ قولعا الدى. كەزىندە قىتايدان 1 مىڭعا جۋىق قازاق جاستارىن الدىرىپ وقىتۋعا پارلامەنت ارقىلى بيۋدجەتتەن قاراجات بولدىرگەن كەزدەرى بولعان. حالىقتىڭ قۇلدىق سانادان ايىعۋى ۇشىن اتقارعان ەڭبەگى دە بىر كىتاپقا جۇك بولارلىقتاي. العاش بولىپ «بىزدىڭ مەملەكەت وتار بولعان مەملەكەت. سوندىقتان وتارسىزداندىرۋ تۋرالى مەملەكەتتىك باعدارلامالار مەن زاڭدار قابىلداۋىمىز كەرەك» دەپ ۇن كوتەردى. پارلامەنت جانىنان وتارسىزداندىرۋعا بايلانىستى زاڭ جوبالارىن جاساۋ جونىندەگى كوميسسييا قۇرعىزعان. پاتشالىق رەسەيدەن باستاپ, كەڭەس وداعىنداعى جۇزدەگەن قۇقىقتىق قۇجاتتاردىڭ سول زاماننىڭ وز زاڭدارىنا سايكەس كەلمەيتىندىگىن اشكەرەلەپ بىرنەشە تومدىق قۇجاتتار دايىنداعان. وسىنىڭ نەگىزىندە «دەكولونيزاتسييا», «قازاقستاندا ازاتتىق پەن تاۋەلسىزدىك جولىندا مەرت بولعان ەرلەردىڭ ەسىمىن قۇرمەتتەۋ», «قازاقستانداعى ساياسي رەپرەسسييا قۇرباندارىن تولىق اقتاۋ», ت.ب. زاڭ جوبالارىن دايىنداعان بولاتىن. تىزە بەرسەك س.قاسىموۆتىڭ باستاماسىمەن ومىرگە كەلگەن, اتقارىلعان يگى ىستەرى قىرۋار. عۇمىرىنداعى ەلى ۇشىن اتقارعان ىستەرىنىڭ شەت-جاعاسىنا عانا توقتالىپ ۇلگەردىك. بارىنە توقتالماي جاقىندا اتقارعان ىسىنىڭ بىرىن اتاپ وتەر بولساق, سماعۇل سادۋاقاسۇلىنىڭ مايىت كۇلىن ماسكەۋ قالالىق اكىمشىلىگىنە شىعىپ ەلگە الدىرعان, ونىڭ جەرلەنۋىن ۇيىمداستىرعان سابەڭ ەكەنىن كوپشىلىگى بىلە بەرمەيدى. سابەڭ بۇل جولى دا ادەتىنە باسىپ وزى اتقارعان شارۋاسىنىڭ تاساسىندا قالۋدى جون كوردى.
سوز سوڭىندا سابىر قاسىموۆ اعامىزعا ايتارىمىز!
الاشتان قالعان ارىسسىڭ,
ۇلتىم دەپ كۇندە الىستىڭ.
اللا بىر دايىم جار بولىپ,
قۋاتىن بەرسىن بارىستىڭ!

فازىلبەك ابساتتارۇلى

بولىسۋ:

Facebook ارقىلى جازىلعان پىكىرلەر

پىكىر نەمەسە جاۋاپ جازۋ

14 + توعىز =