Царнаев пен Қадырбаев кінәларын мойындады

Сот отырысында сондай-ақ жарылыстан зардап шеккендер де қатысты. Олардың арасында қайғылы оқиға кезінде мерт болған 8 жасар ұлдың анасы да бар. Федералды прокурор Уильям Вайнребтің айтуынша, Джохар Царнаев жарылысты қасақана өлім жасау үшін ұйымдастырған. Алайда айыпталушы 2013 жылы болған жарылыстан бері өзіне тағылған барлық айып бойынша кінәсін мойындамай келгені белгілі. Қазір 21 жастағы Джохар Царнаевқа 30-дан астам бап бойынша айып тағылып, өлім жазасы қаупі туып тұр. Ол сондай-ақ жарылыстан кейін қаза тапқан полиция қызметкерінің өліміне себепкер деп танылуда. Сот барысында куәгерлердің де сөзі тыңдалып, жарылыстар түсірілген бейнежазба көрсетілді. Еске салсақ, Джохар Царнаев 2013 жылдың 15 ақпанында туған ағасы Темірлан Царнаевпен бірге дәстүрлі Бостон марафоны кезінде жарылыс ұйымдастырды. Одан 3 адам қаза тауып, 260-ы жараланған болатын. Темірлан Царнаев болса құрықтау операциясы барысында полиция қолынан қаза тапқан еді.

Сондай-ақ, бұл терактіге байланысты істі болған Диас Қадырбаев та айыбын мойындап, тергеуге болысуға келісті, деп хабарлады Азаттық радиосы.

Айыбын мойындаған Диас Қадырбаевтың жазасы жеңілдеуі мүмкін деп мәлімдеді Reuters агенттігі. Естеріңізге сала кетейік, АҚШ-та қамауда отырған Диас Қадырбаевқа бұған дейін "терактіні тергеу ісіне кедергі келтірмек болды" деген айып тағылған. Тамыздың 21 күні Бостонның округтік сотында өткен тыңдауда айыптаушы тарап - прокуратура өкілдері Қадырбаевтың өз айыбын мойындап, тергеушілермен келісімге келгенін, осылайша оған жеті жылдан аспайтын мерзімге жаза қолдануға болатынын айтқан. Қадырбаев бұған қоса өзін АҚШ-тан депортациялауға да келіскен. Бірақ округтік судья Дуглас Вудлак келісімді бірден қабылдай алмайтынын білдірді. Агенттік ақпаратына қарағанда, сот тыңдауына Диас Қадырбаевтың әкесі де қатысқан. Соттан кейін Қадырбаевтың адвокаты Роберт Стал Диас Қадырбаев "өзінің іс-әрекеті үшін жауапкершілікті толық мойнына алатынын" және "Джохар Царнаевтың немесе оның ағасы Тамерланның теракті ұйымдастырғанын білмегенін" айтқан. "Диас жас қой. Ол жарылыс болғанда және мұндай теріс шешім қабылдайтын кезде 19-ға толмаған" деді Стал журналистерге.

Диас Қадырбаевтың ісі бойынша үкім 18 қараша күні шығарылады деп жоспарланған.

АҚШ тергеу орындары Диас Қадырбаев пен тағы бір қазақстандық Азамат Тәжаяқовқа 2013 жылы сәуірде Бостон қаласындағы дәстүрлі марафон кезінде болған жарылысқа қатысты айғақ заттарды жойып, терактілерді тексеруге кедергі келтірген деген айып тағып отыр. Тергеу деректері бойынша, жарылыстан соң үш күннен кейін басты күдікті Джохар Царнаевтың Массачусетс университетінде танысқан достары Азамат Тәжаяқов пен Диас Қадырбаев оның пиротехника салынған рюкзагы мен ноутбугінен құтылған. Шілденің 21-і күні Бостон қаласының өлкелік сотындағы сот алқасы Азамат Тәжаяқовты терактіні тексеруге кедергі келтірді деп таныған. Оған қатысты ақтық шешім қазанның 16-сы күні шығады деп жоспарланған. Джохар Царнаевтың тағы бір танысы – америкалық Робел Филлипоске жалған куәлік берген деген айып тағылған. Оның үстінен қозғаған іс бойынша сот келесі айда басталмақ. 2013 жылы сәуірде Бостон марафоны кезінде бірінен кейін бірі болған екі жарылыс салдарынан үш адам қаза тауып, 260-тай адам жараланған. Джохар Царнаев айыпты деп танылса, өлім жазасына кесілуі мүмкін.